افغانستان جمهور رییسینینگ بیرینچی معاونی مملکتده داعش فعالیتی کوندن کونگه کوپَیب باریشی بارهسیده خواطر بیلدیردی.
اوتگن کون حمل آیینینگ بیرینچی کونی جنرال عبدالرشید دوستم شمالی مزار شریفگه بارگن ایدی. او، مزار شریف شهریده عَلم مبارک کوتاریلیشی مناسبتی بیلن یولگه قوییلگن ییغینده قیلگن چیقیشده داعشگه قرهشلی قاره بیرقلر سانی آشگنلیگی بارهسیده تشویش بیلدیردی.
اونگه کوره، داعشگه طرفدار قوراللی گروهلر فاریاب، سرپل، جوزجان و بدخشان ولایتینینگ ایریم تومنلریده ییرلشگنلر. جنرال دوستم دنیا جماعه چیلیگیدن داعش گروهی نابود ایتیلیشی اوچون بیفرق قالمسلیکلرینی ایتگن.
بو توغریده سلام وطندارگه سوزلهگن ایچکی ایشلر وزیرلیگینینگ سابق معاونیگه کوره، افغانستانده داعش گروهینینگ اعضالری عراق و سوریهگه قرهگنده اونچهلیک ایمس، لیکن شونگه قرهمسدن مذکور گروه افغانستان اوچون جدی تهدید سنلهدی.
شونینگدیک هادی افغانستانده داعش گروهیگه قرهشلی قوراللی شخصلر استراتیژیک منطقهلرنی قولگه آلگنلیک لرینی ایتگن « مساله اوچون منطقه مملکتلرینینگ جاسوسلیک ادارهسی ایش قیلهدی»
عین حالده، خالد هادی دولتدن مخصوص نقابلر بیلن یوزلرینی بیکلهگن قوراللی شخصلرنی دین عالملری همکارلیکی بیلن جدی کورهش باشلهنیشینی سورهگن.
اوتگن وقتلرده دوستم دولت قوراللی مخالفلرینینگ صفیده تورگن قوماندانلردن سنلردی. اونینگ قوشینلری بلخ، جوزجان و غور ولایتلریده طالبلرگه قرشی جدی کورهش آلیب بارگن. اما او سونگی قیلگن چیقیشلریده اوروشدن چرچهگنلیگیگه عاید مسلهلرنی تیلگه آلیب، باشقه اوروش قیلمسلیگینی اظهار قیلگن .
شونینگدیک او اهالیدن طالبلر بیلن اوتکزیلهجک تینچلیک مذاکرهلرنی حمایت قیلیشلرینی سورهگن.
مذکور ییغینده نطق سوزلهگن بلخ ولایت سرپرستی عطامحمد نور تینچلیک مذاکرلردن اوز حمایتینی اعلان قیلگن. عطا، تینچلیک مذاکرهلر ثمر بیریشی اوچون ملی بیرلیک حکومتی بیلن جدی همکارلیک قیلیشدن سوز بیرگن.
شونینگدیک بوندن آلدین حکومت نینگ اجراییه باشلیغی داکتر عبدالله عبدالله مملکتده داعش گروهی پیدا بولگنی، شوکبی مذکور گروه توغریسیده ایریم فکرلر بیلدیره یاتگنلیگیدن تشقری، داعش حرکتیگه نسبتن بیفرق یاندشیلمسلیگینی ایتگن ایدی.
