د افغانستان لویه څارنوالي د ولسمشر لومړي مرستیال عبدالرشید دوستم ته خبرداری ورکړ، که يې دوستم مکتوبونو ته ځواب و نه وايي، نو قانوني چلند به ورسره وکړي.
د هېواد لویه څارنوالي سلاموطندار ته وویل، چې دوی د ولسمشر لومړي مرستیال عبدالرشید دوستم او د جوزجان پخواني والي د جنسي تورونو قضیه نه ده هېره کړې او څېړنې روانې دي.
د لویې څارنوالۍ ویاند جمشید رسولي د پورته ویناوو د څرګندولو ترڅنګ زیاتوي، چې د ولسمشر لومړي مرستیال عبدالرشید دوستم ته یې د احمد ایشچي دوسیې په تړوا مکتوبونه لیږلي دي.
دی زیاتوي، که د دغو مکتوبونو په اړ دوستم لویې څارنوالۍ ته ځواب ونه وايي څېړنیز پلاوی به د احمد ایشچې دوسیه د قانون له مخې وڅېړي.
د ولسمشر پر لومړي مرستیال جنرال عبدالرشید دوستم او ساتونکو يې یوه میاشت مخکې تورنه لګلیدلي وو، چې د جوزجان پخوانی والي احمدخان ایشچي یې له جنسي پلوه زورولی و، چې دې پیښې په ملي او نړیواله کچه پراخ غبرګونونه درلودل.
اروپايي ټولنې او د نړۍ بېلابیلو هېوادو ددې پېښې څېړلو غوښتنه وکړه، چې په دې سره د ولسمشر لومړي مرستیال عبدالرشید دوستم نوم د ټولو کورنیو او بهرنیو رسنیو پر سرخط بدل شو.
اوس چې د یادې پېښې شاوخوا یوه میاشت تېریږي، لویه څارنوالي یې په اړه وايي چې د دوستم په پته يې مکتوبونه لیږلي، خو تر دې دمه يې هېڅ ځواب نه دی ترلاسه کړی.
د رسولي پروینا، په دې وروستیو ورځو کې يې ایشچې د ادعا په اړه یو پلاوی د پلټنو په موخه جوزجان ولایت ته لیږلی و.
د لویې څارنوالۍ ویاند رسولي زیاتوي، چې د احمد ایشچي دوسیه به په جدي توګه وڅېړل شي.
حقوق پوه عبدالکبیر رنجبر وايي، چې د هېواد جزايي اجرا اتو قانون له مخې که تورن ځواب ویلو ته حاضر نهشي محکمه کولای شي چې په غیاب کې يې پرېکړه وکړي.
دوه ورځې وړاندې د ولسمشر ویاند محمد هارون چخانسوري د یوې خبري غونډې پرمهال د دوستم او احمد ایشچې د دوسیې پرڅېړلو ټینګار وکړ.
ومو غوښتل چې د لومړي مرستیال عبدالرشید دوستم ته د لویې څارنوالۍ لیږل شویو مکتوبونو په تړاو د جنبش ګوند نظر هم ولرو خو ددغه ګوند کوم غړی خبرو ته چمتو نهشو.
