یشش محیطنی سقلش ملی اداره رسمیلرینینگ ایتیشیچه، اقلیم اوزگریشی بیلن باغلیق قیینچیلیک و ییرنینگ حرارتی کوتریلیشی دنیا بوییچه جدی معما سنلهدی و افغانستان هم بو خصوصده، جدی خواطر بیلدیرهدی.
یشش محیطنی سقلش اقلیم اوزگریش بولیمی باشلیغی غلامحسین امیریگه کوره، افغانستانده گلخانهیی گازلر چیقیندیلری یریم فایزگه ییتیشمهیدی؛ بیراق صنعتی مملکتلر تامانیدن کونسایین گلخانهیی گازلر چیقیندیلری کوپهییشی، افغانستان اقلیمیگه هم جدی شکلده زیان ییتکیزهدی. جناب امیرینینگ ایتیشیچه، دواملی قوروقچیلیکلر، کوتیلمهگن یامغیرلر و سونگی ییللرده سوو تاشقینلری کوپهییشی، دنیا بویلب اقلیم اوزگریش نتیجهسی دیر.
جناب امیرینینگ ایتیشیچه، افغانستان دولتی «اقلیم اوزگریشلرگه ملی همکارلیک» ناملی لایحهنی صنعتی و گلخانهیی گازلر چیقیندیلرینی ایشلب چیقارهدیگن مملکتلرگه ارایه ایتیشی ممکن.
اوشبو لایحه اساسیده، میلادی 2030- ییلگچه صنعتی مملکتلر تامانیدن افغانستانگه کمیده 17 میلیارد دالر یاردم بیریلهدی. اوشبو لایحه صنعتی مملکتلر تامانیدن حمایه بولگن صورتده، افغانستان کیلهجک 15 ییلده، گلخانهیی گازلرینی 13 فایز کمهیتیرهدی.
اقلیم اوزگریشلرگه ملی همکارلیک لایحهسیده، گلخانهیی گازلر و اقلیم اوزگریشلریگه قرشی کورهشیش خصوصیده، اوچ موضوعدن ایسلنگن: ینگی تکنالوژیلردن فایدهلنیش، سوو باشقریش و افغانستانگه صنعتی مملکتلرنی علمی همکارلیگی دیر.
دنیا اقلیمی اوزگریش دلیلی گاز، نفت و تاش کومیرلردن حددن تشقری فایدهلنیش دییلهدی. یشش محیطنی سقلش اداره رسمیلرینینگ ایتیشیچه، افغانستانده هم ساووق موسومده یانغین مادهلردن کوپ فایدهلنهدی و بو مسئله مملکتده گلخانهیی گازلر کوپهییشیگه سبب بولهدی.
ایتیش لازم، بوگون پاریسده اقلیم اوزگریش خلق ارا ییغینی بیرینچی کونی دیر و شونینگدیک، افغانستان جمهور رییسی، بیر هیأت همراهلیگیده اوشبو ییغینده اشتراک ایتگن.
