مالیه وزیرلیگی بیلن دنیا بانکی‌نینگ اورته‌سیده بیر کیلیشووگه قول قوییلدی، اونگه اساس، اوشبو بانک افغانستان‌نی قیته قوریش صندوقی‌گه برق ایشلب چیقاریش کوپه‌یتیریلیشی و ایکینچیلیک بولیمی‌ده 128 میلیون دالر یاردم بیره‌دی.
بوگون (یکشنبه) مالیه وزیری اکلیل حکیمی‌نینگ ایتیشیچه، اوشبو پول دنیا بانکی‌نینگ قیته تولَّنمس یاردم‌لریدن بولگن و بو پول‌دن 45 میلیون دالری ایکینچیلیک بولیمی‌ده و باشقه 83 میلیونی برق ایشلب چیقاریلیشی خصوصیده، صرف‌لنه‌دی.
ایکینچیلیک وزیری اسدالله ضمیرنینگ ایتیشیچه، اوشبو پول‌دن 45 میلیون دالری سوو ییتکیزیش کانال‌لری قیته قوریلیشی، ایکینچیلیک بولیمی‌ده ینگی فَن ارایه ایتیلیشی، 128 ایسکی سوو ییتکیزیش ترماغی قیته قوریلیشی و 128 ینگی سوو ییتکیزیش ترماغ قوریلیشی‌گه صرف‌لنه‌دی.
جناب ضمیرنینگ ایتیشیچه، اوشبو ریجه اساسیده 12 مینگ هکتار ییرگه سوو ییتکیزیله‌دی و بو ییرلرنی 3 مینگ هکتاری‌گه اوتگن 10 ییل‌ده سوو ییتمه‌گن. جناب ضمیرگه کوره، مذکور ریجه 15 مینگ کیشی اوچون ایش‌گه زمینه یره‌ته‌دی، بی‌جا صرف‌لنه‌دیگن 15 فایز سوونی باشقره‌دی و ایکینچیلیک ییرلر محصولاتی 15 فایز کوپه‌ییشی ممکن.
مالیه وزیری‌نینگ ایتیشیچه، یاردم بیریله‌دیگن پول‌دن 83 میلیون دالری نغلو توغانی برق ایشلب چیقاریش ظرفیتی کوچله‌نیشی خصوصیده، صرف‌لنه‌دی.
افغانستان برقی‌نی تأمین لاوچی برشنا شرکتی‌نینگ ایتیشیچه، کابل- قندهار قتناو یولیده‌گی نغلو توغانی برق ایشلب چیقاریش ظرفیتی‌نی 75 مگاوات‌دن 100 مگاوات‌گه کوپه‌یتیریش اوچون، قرار قیلینگن.
افغانستان برقی‌نی تأمین لاوچی برشنا شرکتی باشلیغی قدرت‌الله دلاوری‌نینگ ایتیشیچه، مذکور ریجه باشلنگن صورتده، افغانستان برق ایشلب چیقاریش توغری‌سیده، اوز باشیمچه‌لیک‌که تامان ینگی آدیم کوتره‌دی. اونگه کوره، حاضر افغانستان برقی‌دن 80 فایزی قوشنی مملکت‌لردن آلیب کیلینه‌دی.
