افغانستان تشقی ایشلر وزیرلیگی نینگ ایتیشیچه، اوتگن کون «دوشنبه، 26- جوزا» ده اوتکزیلگن اوچ تامانلمه ییغینده افغانستان، امریکا و روسیه نینگ نمایندهلری، افغانلر ارا سوزلشوولر باشلهنیشی اوچون طالبان نینگ محبوسلری قوییب یوباریلیشینی خوش قرشیلب و طالبان گروهی دن بو حرکت نی عملگه آشیریشینی سورهگن.
مملکت تشقی ایشلر وزیرلیگی تامانیدن نشر قیلینگن اعلامیه ده ایتیلیشیچه، تشقی ایشلر وزیرلیگی نینگ سرپرستی محمدحنیف اتمر، افغانستان تینچلیک لایحهسی بوییچه امریکانی خاص نمایندهسی زلمی خلیلزاد و افغانستان بوییچه روسیه نی خاص نمایندهسی ضمیر کابلوف بیر ویدیو کنفرانس آرقهلی افغانستان تینچلیک جریانی توغریسیده صحبت قیلیشگن.
اوشبو اعلامیه ده کوپهیتیریلیشیچه، ییغین طرفلری طالبان گروهی دن افغانلر ارا مذاکره باشلهنیشی و ایشانچ قولگه کیریتیلیشی اوچون زوروانلیکلرنی کمهیتیریشینی سورهگن. شونینگدیک، اعلامیه ده کیلیشیچه، طرفلر مذاکره باشلهنیشی اوچون افغانستان دولتی و طالبان نینگ تیارگرلیگی نی خوش قرشیلب و کیینگی باسقیچ اوچون مذاکرهچی تیملرنی آرهسیده بیر ییغین اوتکزیلیشینی طلب قیلیشگن.
تشقی ایشلر وزیرلیگی نینگ اعلامیهسی اساسیده، اوشبو ییغین طرفلری تینچلیک کیلیشوونامهسی گه مطابق دایمی آتیشکیسین افغانلر ارا سوزلشوولرنی کون ترتیبیده آلینیشینی سورهگن.
اعلامیه ده کوپهیتیریلیشیچه: «افغانستان حکومتی نینگ زوروانلیکلر کمهیتیریلیشینی نظارت قیلیش و تینچلیک جریانیده حساب بیریشنی تأمینلش اوچون نظارتی بیر میکانیزم ایجاد ایتیلیشی خصوصیده بولگن تکلیفی ایجابی بیر همکارلیک دیر.»
اوشبو اوچ تامانلمه ییغین یولگه قوییلگن بیرچاغده، اوتگن «یکشنبه کون، 25- جوزا» جمهورلیک ریاست سوزلاوچیسی صدیق صدیقی اوز توییتر صحیفهسیده افغانستان دولتی بیلن طالبان نینگ بیرینچی ییغینی تیزلیککه دوحه ده یولگه قوییلیشینی ایتگن ایدی.
شونینگدیک، بوندن آلدین افغانستان تینچلیک لایحهسی بوییچه امریکانی خاص نمایندهسی زلمی خلیلزاد، دنیا و منطقه مملکتلری تینچلیک تأمینلنیشی اوچون افغانستان نینگ سعی و حرکتلریدن حمایت قیلیشینی بیلدیرگن.
