افغانستان ایچکی ایشلر وزیرلیگی نینگ مسووللری، اخیرگی کونلرده هرات ولایتی نینگ مسجدلریده یوز بیرگن هجوملر داعش حرکتی تامانیدن عملگه آشیریلگن دیدیلر.
هرات ولایتیگه سفر قیلگن ایچکی ایشلر وزیرلیگی جنایتگه قرشی ادارهسی نینگ باشلیغی نجیبالله امان، ولایتدهگی مسجدلرده صادر ایتیلگن هجوملر آرتیده داعش تودهسی تورگن لیگینی بیلدیرگن. اسلامی دولت یا – ده داعش تودهسی جمعیت نینگ معین بیر قتلمینی نشانگه آلیشگه اولگورگن دیگن جناب امان.
جناب امان، افغانستان حکومتی نینگ بیرینچی ایشی بوندهی جنایتنی ایلدیزدن تاپیش دیدی.
هرات ولایتی نینگ ولایت کینگشی اعضاسی مهدی حدید، مسجدلرده صادر بوله دیگن انتحاری هجوملر آرتیده قوشنی دولتلر جاسوسلیک ادارهسی نینگ قولی بارلیگینی تیلگه آلگن. منقطه جاسوسلیک ادارهسی انسانیتگه قرشی بو قیلمیش بیلن افغانستان خلقی ایچیده ینه فتنه اویغتماقچی بولهدی دیگن کینگش اعضاسی.
مملکت غربیده جایلشگن هرات ولایتی نینگ اهالیسی، مرکزی حکومتدن خلق نینگ امنیتی تامین بولیش مسالهسیگه بیفرق یاندهشمسلیکلرینی سورهگنلر.
سونگی اوچ آی جریانیده هرات ولایتیده اوچ مسجدده پارتلش عملگه آشیریلگن لیگی ایتیلهدی. بو مسجدلردن ایکّی تهسی مملکت نینگ کته قتلمینی تشکیل ایتیووچی شیعه مذهبلیلرگه تعقللی.
بوندن ایکّی کون آلدین هرات ولایتی ابریشم خیابانیده جایلشگن مسجدده عملگه آشیریلگن هجومده مسجد امامی قربان بولیب، باشقه بیش عبادتچی یرهلنگن ایدی.
عین حالده، کابل نینگ کارتهسخی زیارتگاهی همده باقرالعلوم مسجدیده یوز بیرگن هجوم مسوولیتینی داعش تودهسی ذمهسیگه آلگن ایدی.
