اوتگن نیچه کونده مملکت خوفسیزلیک کوچلری قطار ولایت‌لرده آغیر قربان‌لیک بیرگن.
قطار ولایتلرنینگ امنیتی و محلی مسئوللری آرقه‌لی بیریلگن رقملر اساسیده، اوتگن پنج‌شنبه‌دن (5- جدی) بوگونگه قدر (یکشنبه 8- جدی) طالبلرنینگ تورلی هجوم‌لری باعث، امنیتی کوچلردن 57 ته‌سی هلاک و باشقه 16 ته‌سی یره‌لنگن.
مذکور امنیتی کوچلر بلخ، غزنی، تخار، بغلان، فاریاب، هلمند و جوزجان ولایت‌لریده هلاک و یره‌لنگن.
اوتگن پنج‌شنبه بلخ ولایتی نینگ بلخ تومنیده حربی کوچلردن 14 ته‌سی طالبان بیلن اوتکزگن بیر آتیشمه و بمب جایلشتیرگن بیر تانک پارتلشی‌ده عاقبتیده هلاک بولگن.
اوشه پیت ملی مدافعه وزیرلیگی بو حادثه‌ده، حربی کوچلردن 6 ته‌سی هلاک و باشقه 3 ته‌سی یره‌لنگنی نی اعلام قیلگن ایدی.
شونینگدیک بوگون ایرته‌لب امنیتی کوچلردن 2 ته‌سی فاریاب ولایتی نینگ المار تومنیده هلاک ایتیلگن.
فاریاب پولیسی سوزلاوچیسی عبدالکریم یورش نینگ ایتیشیچه، مذکور هجوم‌ده باشقه بیر حربی یره‌لنگن.
اوتگن کیچه تخار ولایتی نینگ خواجه بهاو‌الدین تومنیده یوزبیرگن ینگی بیر حادثه‌ده، «ملک تاتار» گه تیگشلی مردمی کوچلر طالبان نینگ هجومی گه دوچ کیلگن کیم نتیجه‌ده، اوشبو حربی‌لردن 17 ته‌سی هلاک و باشقه 7 ته‌سی یره‌لنگن.
شونینگدیک غزنی پولیسی سوزلاوچیسی احمدخان سیرت نینگ ایتیشیچه، اوتگن نیچه کونده قره‌باغ و ده‌یک تومن‌لریده امنیتی کوچلر و طالبان گروهی آره‌سیده یوزبیرگن آتیشمه‌لرده، امنیتی کوچلردن 5 ته‌سی هلاک و باشقه 3 ته‌سی تن جراحتی کوتارگن.
شو توغریده:
- بلخ ده امنیتی کوچلردن 14 ته‌سی هلاک ایتیلگن
دایکندی؛ امنیتی کوچلردن 8 ته‌سی طالبان تامانیدن اولدیریلگن
عین حالده، اوتگن کون هلمند ولایتیده امنیتی کوچلردن 10 ته‌سی هلاک ایتیلگن.
هلمند حاکمی سوزلاوچیسی عمر زواک نینگ ایتیشیچه، اوشبو ولایت نینگ سنگین تومنیده جایلشگن 2- پیاده حربی لوا کوچلری نینگ پوسته‌سیده پارتلش یوزبیرگن کیم نتیجه‌ده، حربی کوچلردن 10 ته‌سی هلاک و باشقه 4 ته‌سی یره‌لنگن.
باشقه بیر تاماندن اوتگن کون جوزجان-بلخ قتناو یولیده یول چیککه‌سیده جایلشتیریلگن بیر ماین پارتلشی عاقبتیده، امنیتی کوچلردن 3 ته‌سی جان بیرگن.
جوزجان حاکمی سوزلاوچیسی عبدالمعروف آذرنینگ ایتیشیچه، بو حادثه امنیتی کوچلرنینگ بیر تانکی یول چیککه‌سیده جایلشتیریلگن ماین گه دوچ کیلیشی بیلن یوزبیرگن. بو حادثه‌ده امنیتی کوچلردن باشقه بیری یره‌لنگن.
عین دمده، مرکزی بغلان تومنیده حربی کوچلرنینگ بیر پوسته‌سی طالبان هجومی گه دوچ کیلگن کیم نتیجه‌ده حربی کوچلردن 6 ته‌سی هلاک و شونینگدیک اولردن 4 ته‌سی طالبان آرقلی اسیر آلینگن.
قطار گزارشلر اساسیده، طالبان رهبرلری نیچه کون‌لیک بیر آتیش کیسین اوستیگه کیلیشگن بیر حالده، طالبان هجومی سبب امنیتی کوچلر تلفاتی نینگ رقمی یوقاری کیتگن.
