خوست کې د نظامي شورا د پرېکړې پر اساس د دې ولایت له ۱۲ ولسواليو یې ۸ هغه د امنیتي تهدیدونو لاندې دي او له امله به پهکې د رایېورکولو ۲۷ مرکزونه وتړل شي.
د یادو ولسوالیو له ډلې سپېره، باک، قلندر، موسیخېل، نادرشاهکوټ علیشېر، اسمعیلخېل او مندوزي هغه ولسوالۍ دي چې امنیتي چارواکي یې امنیت خوندي نه بولي.
د همدې نظامي پرېکړې په غبرګون کې نن د خوست د بېلابېلو ولسوالیو مشرانو او ځوانانو یوې خبريٍ غونډې کې د نظامي شورا یاده پرېکړه وغندله او هغه یې سیاسي وبلله.
د دو تنو مشرانو زمرک ځدراڼ او ګلاحمد د نظامي شورا یاده پرېکړه په لوی لاس د خوست ښه امنیت ته سپکاوی وګنلو او په وینا یې، د دغو مرکزونو په تړلو کې د یو برحال وکیل لاس دی؛ د دوی په خبره، وکیل پهدې مرکزونو کې رایې نهلري؛ نو د یوې دسیې په توګه غواړي هغه وتړي.
دوی په ټینګار سره غوښتنه وکړه چې څنګه هغه ولسوالۍ چې تر اوسه د سولې په نوم نومول شوېوې؛ اوس د رایېورکولو مرکزونو په کې تړل کېږي.
د خوست د ټاکنو خپلواک کمېسیون رییس شاهجهان سرداري وايي چې دوی پوره چمتو دي؛ خو په وینا یې، دا د امنیتي چارواکیو کار دی او باید امنیت یې ونیسي.
له بلېخوا د خوست امنیې قوماندان اخترمحمد نورزی بیا وايي، دوی د رایېورکولو د مرکزونو د تړلو پرېکړه تر اوسه نهده عملي کړې؛ خو زیاتوي چې د ولسوالانو د معلوماتو لهمخې یو شمېر ولسوالۍ تر امنیتي تهدیدونو لاندې دي.
خوستمېشتي او مدني فعالان وايي، هغه مرکزونه چې پرته له امنیتي تهدیدونو پهکې نوملیکنه شوې؛ اوس د رایواچوونکیو پر مخ تړل کېږي. دوی زیاتوي، هغه مرکزونه چې اداري کمپلېکس سره په ۱۰۰ مترۍ کې پراته دي، هم تړل کېږي.
دوی د امنیتي چارواکیو دغه پرېکړه ـ چې د خوست په ۸ ولسوالیو کې د امنیتي تهدیدونو له امله د رایېورکلو ۲۷ مرکزونه تړي ـ حکومت پهخپل ځان عریضه کول بولي.
