سپتامبر آی نینگ 10- تاریخی «خودکش‌لیک آلدینی آلیش» خلق ارا کونی بیلن ماس کیلگن. هرات حوزه‌وی کسلخانه مسوول‌لری نینگ ایتیش‌لریچه، جاری ییل باشلنگندن حاضرگه‌قدر کمیده 8 یوز کیشی اوشبو ولایتده خودکشلیککه اقدام قیلگن و بوجمله‌دن 12 ته‌سی اوزینی اولدیرگن.
ساغلیقنی سقلش وزیرلیگی‌گه کوره، مملکت بوییچه خودکش‌لیک واقعه‌سی اروپالیک مملکت‌لرگه نسبتن کم دیر. اوشبو وزارت مسوول‌لری نینگ ایتیش‌لریچه، ایکی ییل آلدین اویمه‌اوی اوتکزیلگن تیکشیریش‌لرگه قره‌گنده، مملکت بوییچه 7.25% اهالی خودکشلیککه فکر، 3.9% خودکشلیککه قرار و 3.4% اهالی خودکشلیککه اقدام قیله‌دی.
ساغیلق‌نی سقلش وزیرلیگی نینگ روانی ساغلیک بولیمی مسوولی بصیر احمد سروری نینگ سلام‌وطندارگه ایتیشیچه، کرونا ویروسی چیقگنی سبب، خودکشلیککه اقدام قیلگن کیشی‌لردن بیللی ارقام توپلنمه‌گن.
اونینگ ایتیشیچه، اوتگن ییل مملکت بوییچه 7 مینگ و 65 کیشی خودکشلیککه اقدام قیلگن و بو جمله‌دن 558 ته‌سی جان بیرگن.
اونینگ کوپه‌یتیریشیچه، ساغلیقنی سقلش وزیرلیگی نینگ تیکشیریشی‌گه کوره، خودکشلیککه اقدام قیلگن‌لرنینگ کوپراغی جنوب، جنوب-غرب و غرب ولایت‌لرده قید قیلینگن.
هرات حوزه‌وی کسلخانه‌سی باش طبیبی داکترعارف جلالی نینگ ایتیشیچه، جاری ییل باشلنگندن حاضرگه‌قدر 762 کیشی اوشبو ولایتده خودکشلیککه اقدام قیلگن و بو جمله‌دن 3 ایرکک شامل 12 کیشی اوزینی اولدیرگن.
جناب جلالی‌گه کوره، خودکشلیککه اقدام قیلگن 762 کیشی جمله‌سیدن 170 ته‌سی ایرکک و باشقه‌لری عیال دیر. اونینگ کوپه‌یتیریشیچه، کونده اورتلمه 5 کیشی خودکشلیککه اقدام قیله‌دی.
زرمینه (مستعار اسم) خودکشلیککه اقدام قیلگن هرات‌لیک عیاللردن بیری دیر، بیراق جانی‌نی قولدن بیرمه‌گن. او، زوردن تورموش‌گه چیقاریلگنی سبب، خودکش‌لیک قیلیش‌نی ایسته‌گن.
زرمینه 8 یاشر بیر باله نینگ آنه‌سی دیر . او، 3 مرته خودکشلیککه اقدام قیلگن، بیراق موفق بولمه‌گن.
هرات ولایتی بوییچه ساغلیقنی سقلش مسوول‌لری نینگ ایتیش‌لریچه، اوتگن ییل 1800 کیشی اوشبو ولایتده خودکشلیککه اقدام قیلگن ایکنلر و بو جمله‌دن 10 ایرکک شامل 30 کیشی اوز جان‌لرینی قولدن بیرگن.
