خواجه عمری تومنی کمیده بیر ییل آلدین غزنی شهری طالبان گروهی نینگ قولی گه سقوط قیلگنده، مذکور گروه نینگ نظارتی گه اوتگن ایدی.
غزنی حاکمی سوزلاوچیسی محمدعارف نوری نینگ ایتیشیچه، بوگون ایرتهلب امنیتی کوچلر تامانیدن یولگه قوییلگن حربی عملیات نتیجهسیده خواجه عمری تومنی نینگ بِناسی طالبان نینگ نظارتی دن چیقاریلگن. اوشبو خبر ملی مدافعه وزیرلیگی تامانیدن هم تصدیقلنگن.
خواجه عمری تومنی دولتی کوچلر تامانیدن طالبان نینگ نظارتیدن چیقاریلگنیدن نیچه ساعت اوتگنیدن سونگ، غزنی حاکمی وحیدالله کلیمزی خبری بیر ییغین اوتکزیب ایتیشیچه، مذکور تومنده کوپراق حربی کوچ جایلشتیریلگنیدن سونگ، تیزلیککه بوتون اداری بولیملری فعال قیلینهدی.
غزنی ولایت کینگشی اعضالریدن بیری حسنرضا یوسفی نینگ ایتیشیچه، طالبان گروهی خواجه عمری بِناسیدن ایریم بولیملرینی بوزیب تشلهگن و بوتون امکانیت و جهازلرینی اوتگه یاندیرگن. اونگه کوره، احتمال باریچه طالبان گروهی مذکور تومن بِناسی و یولیده ماین ییرلشتیرگن.
طالبان گروهی حاضرگچه بوتوغریده هیچ نرسه دیمهگن.
امنیتی کوچلر کمیده اون کون آلدین هم ریجهلنگن بیر عملیات نتیجهسیده غزنی ولایتی نینگ دهیک تومنینی بیر ییلدن سونگ، طالبان نینگ نظارتی دن چیقارگن ایدی.
ملی مدافعه وزیرلیگی خواجه عمری تومنی امنیتی کوچلر آرقهلی طالبان نظارتیدن چیقاریلگنیدن خبر بیرگن بیرچاغده، اوتگن کون زابل ولایتی گه سفر قیلگن مذکور وزیرلیک سرپرستی اسدالله خالد، مملکت نی ایریم بولیملری طالبان نینگ نظارتیده بولگنی و تیزلیککه دولتی کوچلر آرقهلی طالبان نینگ نظارتی دن چیقاریلیشی خصوصیده خبر بیرگن ایدی.
