قطر ده طالبان سیاسی دفتری سوزلاوچیسی نینگ ایتیشیچه، افغانستان تینچلیگی بوییچه آمریکا خاص نمایندهسی زلمی خلیلزاد مذکور گروه نینگ سیاسی اورینباسری ملا عبدالغنی برادر و مذاکره قیلووچی هیأت باشلیغی عبدالحکیم حقانی بیلن اوچرهشگن.
بوگون (سه شنبه ۱۸- سنبله) قطرده طالبان سیاسی دفتری سوزلاوچیسی محمدنعیم وردک بیر توییت یازیب ایتیشیچه، بو اوچرهشوو اوتگن کون (دوشنبه ۱۷- سنبله) صورت تاپگن.
طالبان سیاسی دفتری سوزلاوچیسی نینگ یازیشیچه، اوشبو اوچرهشووده قطر باشوزیری اورینباسری عبدالرحمان آل ثانی و مذکور مملکت تشقی ایشلر وزیری هم موجود ایکن.
وردک که کوره، مذکور اوچرهشووده محبوسلر بوتونلی قوییب یوباریلیشی و افغانستانلیکلرارا سوزلشوولر باشلهنیشی اوستیگه بحث قیلینگن.
طالبان سیاسی دفتری سوزلاوچیسی، بوگون ایرتهلب بیر توییت آرقهلی محبوسلرنی قوییب یوباریش پروسهسی بوتونلی یکونلنمهگنیدن خبر بیردی.
بوندن آلدین افغانستان ملی خوفسیزلیک کینگش دفتری، طالبان گروهی محبوسلری بوتونلی قوییب یوباریلگن دیگن ایدی.
اوتگن کون تشقی مملکتلر یشاوچیلری نینگ اولدیریش گه عیبلنگن طالبان گروهی نینگ ۶ محبوسی قطر ده انتقال بیریلدی.
