افغانستان تینچلیک لایحه‌سی بوییچه آمریکا تشقی ایشلر وزیرلیگی‌نی خاص نماینده‌سی زلمی خلیلزاد، منطقه‌یی سفرلری دوامیده ایکی کون آلدین کابل‌گه ییتیب کیلدی.
خلیلزاد کابل گه ییتیب کیلگنیدن سونگ، جمهور رئیس محمداشرف غنی، اجراییه باشلیغی عبدالله عبدالله، جهادی رهبر عبدالرب رسول سیاف و حکومت نینگ سابق و حاضرگی رسمی‌لریدن بیرقطاری بیلن اوچره‌شیب تینچلیک سوزلشوولری خصوصیده صحبت قیلگن.
سلام‌وطندارگه صحبت بیرگن جمهورلیک ریاستی سوزلاوچیسی اورین باسری شاه‌حسین مرتضوی نینگ ایتیشیچه، اوتگن کیچه جمهور رئیس غنی افغانستان تینچلیگی توغریسیده جناب خلیلزاد بیلن اوچره‌شیب و تینچلیک خصوصیده بولگن جاری سعی و حرکت‌لر توغریسیده بحث قیلگن.
اونینگ کوپه‌یتیریشیچه، ایکی تامان آره‌سیده بحث‌لر دوام ایته‌دی و بو بحث‌لرده بولگن حرکت‌لرنی معلوماتی اهالی بیلن شریک قیلینه‌دی.
افغانستان تینچلیک لایحه‌سی بوییچه آمریکا تشقی ایشلر وزیرلیگی‌نی خاص نماینده‌سی توییتر صحیفه‌سیده یازیشیچه، اوشبو اوچره‌شوولرده سیاسی حزب‌لر، دولت نماینده‌لری، عیاللر، مدنی جماعه‌چیلیک و یاشلرنینگ حضوریده تینچلیک سوزلشوولری خصوصیده تولیق بیر تیم تشکیل ایتیلیشی اوستیگه صحبت قیلینگن.
جناب خلیلزادنینگ ایتیشیچه، افغانستان اجراییه باشلیغی عبدالله عبدالله بیلن اوچره‌شگنده، افغانستانلیک‌لر ارا تینچلیک سوزلشوولریدن دنیاجماعه‌چیلیگی حمایتی قنده‌یلیگی توغریسیده بحث قیلگن.
شو توغریده…
خلیلزاد: افغانلر ارا تینچلیک سوزلشوولر جریانی چقانلنیشی کیره‌ک
خلیلزاد: افغانستان تینچلیک جریانی قولَی و هموار ایمس دیر
خلیلزاد گه یوباریلگن نامه؛ 18 ییل‌لیک یوتوقلر قربان بولمه‌سین
زلمی خلیلزاد، اوشبو اوچره‌شوولردن سونگ، بوگون قندهار کیتدی و بو سفریدن مقصد قوم بویوک‌لری بیلن اوچره‌شیش دییلگن.
عین حالده، بوگون افغانستان بوییچه بیرلشگن ملت‌لر تشکیلاتی‌نینگ باش کاتبی‌نی نماینده‌سی تادامیچی یاماموتو بیلن اوچره‌شگن جمهور رئیس ایکینچی اورین باسری سرور دانش نینگ ایتیشیچه، تینچلیک مذاکره‌لری توغریسیده دولت رولی‌ده سیاسی رهبرلر و اهالی نینگ فکری بیر دیر.
جناب دانش نینگ فیسبوک صحیفه‌سیده یازیشیچه، تینچلیک مذاکره‌لریده دولت رولی سقلنه‌دی و شونینگدیک، اوشبو جریان اختیاری افغانستان اهالیسی گه تیگیشلی بوله‌دی.
جمهور رئیس نینگ ایکینچی اورین باسری گه کوره، طالبان گروهی بیلن تینچلیک سوزلشوولرینی آلغه آلیب باریش خصوصیده تولیق بیر هیأت تشکیل ایتیلیشی اوچون سیاسی رهبرلر بیلن حکومت نینگ مصلحتی دوام ایتماقده.
عین حالده، جمهورلیک ریاستی و اجراییه ریاستی سوزلاوچی‌لری نینگ ایتیشیچه، مذکور هیأت ترکیبی‌نی سونگی رویخطی تیزلیک‌که اعلان ایتیله‌دی.
