خبر تیارلش اوچون ملی کینگش‌گه باره‌دیگن قطار خبرچیلر، نماینده‌لر مجلسی امنیتی خادملری تامانیدن اهانت بولگنلری باعث بوگون (چهارشنبه) مجلس عمومی ییغینی خبرلرینی تحریم قیلگنلر.
اعتراضچی خبرچیلر شفقت‌سیزلیک و نماینده‌لر مجلسی امنیتی خادملری‌نینگ درست یانده‌شمسلیگی حوصله‌لرینی پیر قیلگن لیگینی تیلگه آلگنلر.
مذکور خبرچیلرگه کوره، امنیتی خادملرنینگ قوپال یانده‌شیشی‌دن علاوه، نماینده‌لر مجلسی نینگ سالونی‌ده مناسب مکان یوقلیگی آوازنی یازیب آلیش‌ده درست تخنیکی سیستم بولمه‌گنی باشقه قیینچلیکلردن حسابلنه‌دی.
نماینده‌لر مجلسی امنیتی خادملری‌نینگ یانده‌شیشی خبرچیلرگه نسبتن ایجابی اوزگرمه‌گن تقدیرده، مجلس ییغینلرینی خبرینی تحریم قیلیش حقیده آگاهلنتیرگنلر خبرچیلر.
ملی مجلس امنیتی خادملری خبرچیلر بیلن قوپال یاند‌ه‌شگنلیگی توغریسیده خواطر بیلدیرگن سنا مجلسی‌نینگ اعضاسی نثار حارث، خبرچیلر معلومات‌گه قول تاپیشی اوچون هیچ کیم توسیق بوله آلمیدی دیگن. شونینگدیک او، مجلس اعضالریدن خبرچیلرگه نسبتن شفقت‌سیز بولمسلیکلرینی سوره‌گن.
مملکت ملی کوچلری‌نینگ خبرچیلرگه نادرست یانده‌شیشی هر دایم خبرچیلر حق حقوقینی مدافه قیلیوچی تشکیلاتلری‌نینگ جدی عکس‌العملی‌گه روپه ره بولگن. شوکبی حکومت‌نینگ بلند مرتبه‌لی رسمیلری هر دایم بونده‌ی واقعه‌لر آلدی آلینیشی اوچون وعده بیرگنلر؛ اما خبرچیلر سوزلریگه قره‌گنده حکومت هنوزگچه بو توغریده دییرلی آدیم کوتارمه‌گن.
