سلام‌وطندار اختیاریگه توشگن حجت‌لرگه کوره، بایومتریک اسکونه‌لریدن بیری، نماینده‌لر کینگشی نامزدلریدن بیری خالد اسد نینگ منفعتی‌گه قوله‌نیش اوچون سیلاو سایتی‌گه سقلنگن و شونینگدیک، مذکور حجت‌لر، دولتی ییرلرنی جناب اسد تامانیدن غصب ایتیلیشی‌نی کورسته‌دی.
منبع‌گه کوره، خالد اسد سیلاولر کمیسیونی تامانیدن اعلان ایتیلگن بیرینچی نتیجه‌ده یوتوققه ییریشگن‌لر جمله‌سیدن ایمس ایکن، بیراق نهایی نتیجه‌ده محمد میرزا کتوازی و نادرخان کتوازی دن سونگ، 3- جایگاه‌گه قرار تاپگن.
سلام‌وطندار اختیاریگه توشگن حجت‌لرگه کوره، مذکور بایومتریک اسکونه‌سی، خالد اسد منفعتی‌گه ساخته‌کارلیک قیلیش اوچون سیلاو سایتی‌گه سقلنگن و سیلاو کونی‌ده جناب اسدنینگ منفعتی‌گه ساخته‌کارلیک بولگن.
سیلاولر شکایت‌لرینی تینگلش کمیسیونی‌گه پکتیکا ملی خوفسیزلیک ریاستی تامانیدن یوباریلگن مکتوب‌ده کیلیشیچه: «شرن مرکزی دلو قیشلاغیده جایلشگن بدر مکتبی ده‌گی آوازبیریش سایتی‌گه تیگیشلی پرنتر و «SVTAE003648» سریال نمبرلی چارجری بیلن بولگن بیر بایومتریک اسکونه‌سی اولرنینگ قولیگه توشگن. معلومات‌گه کوره، مذکور بایومتریک اسکونه‌سی پکتیکا نماینده‌لر کینگشی سیلاوی‌نینگ نامزدلریدن بیری بولگن خالد اسدنینگ منفعتی‌گه ساخته‌کارلیک قیلیش اوچون سایت ایشلاوچیلری تامانیدن سقلنگن ایکن و سایت ایشلاوچیلری خالد اسد نینگ منفعتی‌گه ایش قیلگنلر.»
اوشبو مکتوب باشقه بیر بولیمیده، بدر مکتبی‌ده جایلشگن سیلاولرده آواز بیریش مرکز ایشلاوچیلری، آواز بیریش لایحه یکونلنگنی‌دن سونگ، اوشبو بایومتریک اسکونه‌سینی‌دن قوله‌نیب خالداسد منفعتی‌گه ساخته‌کارلیک قیله‌دیگن بیرچاغده، بو اداره ایشلاوچیلری تامانیدن قولگه آلینگن‌لر.
مذکور مکتوب‌ده، پکتیکا ولایتی بوییچه سیلاولر شکایت‌لرینی تینگلش کمیسیونی‌دن، جناب اسد نینگ آوازلرینی تیکشیریلیشی ایسته‌لگن.
پکتیکا ولایتی بوییچه سیلاولر شکایت‌لرینی تینگلش کمیسیونی باشلیغی فهیم صمیم نینگ سلام‌وطندارگه ایتیشیچه، پکتیکا ملی خوفسیزلیک اداره‌سی تامانیدن یوباریلگن مکتوبی‌ده جزییاتی بیریلمه‌گنی باعث، اولر بایومتریک اسکونی خصوصیده بولگن دوسیه‌نی تیکشیریلیش اوچون اوشبو ولایت باش قاره‌لاوچیلیک اداره‌سیگه یوبارگن‌لر، بیراق حاضرگه‌قدر نهایی قرار آلینمه‌گن.
جناب صمیم گه کوره، بدر مکتبی‌نینگ آوازلری، پکتیکا ولایتی بوییچه سیلاولر شکایت‌لرینی تینگلش کمیسیونی تامانیدن بیکار قیلینگن، بیراق مرکزی کمیسیون اولرنینگ قراریگه قرشی مذکور مرکز آوازلرینی آق اعلان قیلگن: « خوفسیزلیک اداره‌سی بو موضوع‌نی نامعلوم شکلده بیزگه یوباردی، او اوچون قرار قیلیش امکانی یوق ایدی. بیز دوسیه‌نی مرکزی کمیسیون‌گه یوباردیک، بیراق قیته‌دن بیزگه یوباردیلر، تیکشیریش و استعلام‌لردن سونگ، مذکور موضوع‌نی باش قاره‌لاوچیلیک‌که یوباردیک و باش قاره‌لاوچیلیک‌که بیریلیشی اوچون دارالانشا گه هدایت بیردیک، بیراق حاضرگه‌قدر بیزگه جواب بیریلمه‌گن نهایی قرار آلینگن ایمس.»
شونینگدیک، باشقه بیر حجت‌گه کوره، نماینده‌لر کینگشی نامزدلریدن بولمیش خالد اسد، دولتی ییرنی غصب قیلیش‌گه هم عیب‌لنگن دیر.
سلام‌وطندار اختیاریگه توشگن حجت‌گه کوره، پکتیکا ولایتی بوییچه سیلاولر شکایت‌لرینی تینگلش کمیسیونی آمری محمدفهیم منگل، عدلیه ریاستیدن جناب خالد اسد و محمودخان سلیمان‌خیل نینگ عیب‌لری توغریسیده مستند معلومات ارایه قیلیشی‌نی سوره‌گن .
عدلیه ریاستی مذکور مکتوب‌ده بوندی جواب قیترگن: « محمودخان سلیمان‌خیل‌نی بو اداره ده هیچ‌قندی دوسیه‌سی یوق، بیراق خالد اسد شرن شهریده بلدیه پارکی اوچون اختصاص بیریلگن ییرنی غصب قیلیش‌گه عیب‌لنگن و اونینگ دوسیه‌سی عدلی و قضایی اداره‌لرده تکشیریش آستیگه قرار تاپگن و حاضرگه‌قدر نهایی بولمه‌گن.»
اونینگ چکه‌سیده، پکتیکا اراضی اداره‌سی بیر مکتوب آرقه‌لی، ییرنینگ قندی شکلده غصب ایتیلگنی توغریسیده ولایت مقامی‌ده معلومات بیریب و مذکور دولتی ییرده بنا قوریش‌گه رخصت بیریلمه‌یشی‌نی سوره‌گن. شونینگدیک، جنایی جرایم‌لرگه قرشی کوره‌ش عمومی اداره‌سی، پکتیکا ولایتی‌نینگ بیرینچی امنیتی حوزه‌سیده مکتوب یوباریب و غصب ایتیلگن ییرده بنا قوریش ایش‌نینگ توخته‌تیلیشی‌نی سوره‌گن.
عین‌حالده، پکتیکا استیناف محکمه‌سی تامانیدن اوشبو ولایت شهری محکمه‌سیگه مکتوب یوباریلگن. اوشبو مکتوب‌گه کوره، باش قاره‌لاوچیلیک حقیقت‌لرنی نظرده آلمی دولتی ییرنی شخصی اثبات‌لگن و اوشبو موضوع‌نی جدی شکلده تیکشیریلیشی کیره‌ک.
اوشبو مکتوب نینگ باشقه بیر بولیمیده بونده‌ی یازیلگن: « ییریک اداره‌لرنینگ رسمی معلوماتی‌گه کوره، قلم‌خان اوغلی حاجی محمدرفیق و نور محمد اوغلی شیرافضل تامانیدن اکبرخان اوغلی خالدگه ساتیلگن ییر دولتی ملکیت اثبات‌لنگن.»
بیراق، پکتیکا ولایتی‌نینگ ایلغار نماینده‌سی خالد اسد اوشبو عیب‌لاولرنی رد قیلیب ایتیشیچه، نماینده‌لر کینگشی‌نینگ سابق اعضالریدن بیرقطاری اونگه قرشی دوسیه توزه‌تگنلر. جناب اسد نینگ ادعا قیلیشیچه، مذکور ییردن شرعی قباله‌سی بار و شونینگدیک، مملکت سابق جمهور باشلیغی بو توغریده حکم بیرگن.
«مین محلده سوداگر ایدیم، سرمایه یاتقیزیش‌نی ایسته‌ریدیم، نماینده‌لر کینگشی‌نینگ سابق اعضالریدن بیرقطاری فاسد ایدیلر و اولر بو قیین‌چیلیک‌نی توزه‌تگنلر. حامد کرزی حکومتیده اوشبو موضوع‌نی تیکشیریش اوچون بیر هیات ایجاد ایتیلدی، باش قاره‌لاوچیلیک هم بیر هیات‌نی پکتیکا ده یوباردی و اولر ییر نینگ غصب ایتیلیش موضوعسینی تیکشیرگن‌دن سونگ، نتیجه‌نی مملکت سابق جمهور باشلیغی‌گه یوباردیلر. جمهور رییس هم هیچ‌کیم نینگ دخالت و مزاحمت قیلمه‌یشی اوچون حکم صادر قیلدی.»
عین‌حالده، افغانستان سیلاولرینی کوزه تیش شفافیت اداره‌سی یا-ده تیفا گزارشی گه کوره، سیلاو اوچون ساتیب آلینگن 22 مینگ بایومتریک اسکونه‌‌دن 5 مینگ ته‌سی یوقلگن دیر.
