افغانستاننینگ شمالی و شمالشرق ولایتلریده ملی اسلامی جنبش حزبینینگ طرفدارلری و اعضالریدن مینگلرچهسی 8- کون ناراضیلیک نمایشلرگه قول اوریب و حکومتنی خاص بیر قومنی قتغن قیلیشگه عیبلهیدیلر.
فاریاب ولایتیده افغانستان ملی اسلامی جنبش حزبیگه تیگیشلی قومندانلردن بیری نظامالدین قیصاری قولگه آلینگنیدن سونگ، مملکتنینگ شمالی و شمالشرق ولایتلریده مرکزی حکومت گه قرشی ناراضیلیک نمایشلر یولگه قوییلدی.
افغانستان ملی اسلامی جنبش حزبی، اسلامی جمعیت حزبی و افغانستان اهالیسینینگ وحدت حزبینینگ مینگلرچه اعضا و طرفداری، فاریاب، جوزجان، بلخ، تخار، بدخشان و بامیان ولایتلریده ناراضیلیک نمایشلرنی یولگه قوییب، قتناو یوللرنی باغلب و شهرلرنینگ ایریم ییرلریده دادخواهلیک خیمه قورگنلر.
اعتراضچیلر نظامالدین قیصاری قوییب یوباریلیشی و جمهورلیک ریاستینینگ بیرینچی اورین باسری جنرال عبدالرشید دوستم مملکتگه قیتیشینی سورهیدیلر. اولرنینگ ایتیشیچه، ایستکلریگه ایجابی جواب بیریلمهگن صورتده، ناراضیلیک نمایشلریگه دوام بیرهدیلر.
بلخ و بدخشان ولایتلریده اعتراضچیلردن ایکی کیشی زلمی عبدالصمدنینگ ایتیشیچه، ایستکلری عملگه آشیریلگونگهقدر ناراضیلیکدن قول تارتمهیدیلر و شونینگدیک، چیگرهلر و قتناو یوللرنی ترافیک یوزیگه یاپهدیلر.
شونینگدیک، فاریاب و تخار ولایتلریده اعتراضچیلردن باشقه بیرقطاری، حکومتنی خاص بیر قومنی قتغن قیلیش، یکهتازلیک و زورهوانلیککه عیبلب ایتیشیچه، حکومتنینگ زورهوانلیک و تبعیضگرلیک ایشلری مملکتنی قیینچیلیککه روپهره قیلهدی.
فاریاب اعتراضچیلریدن فایزینینگ ایتیشیچه، حکومت خلق ایستکلرینی کم آلمهی و خلقنینگ ارادهسینی اویین گه آلمهسی کیرهک.
تخار ولایتیده هم ایکی کوندن بویان اعتراضچیلر ناراضیلیک نمایش یولگه قوییب و دادخواهلیک خیمهلر قورگنلر. اعتراضچیلرنینگ آگاهلنتیریشیچه، ایستکلریگه ایجابی جواب بیریلمهگن صورتده، قتناو یوللر و چیگرهلرنی باغلب و تیزیمگه قیام قیلیشلری ممکن.
حکومت تامانیدن نظامالدین قیصاری توتقونگه آلینیشی شمال حوزهسینی سیاسی و اجتماعی جریانلرینینگ قتیق عکسالعمللریگه روپهره بولدی؛ بیراق حکومتنینگ ایتیشیچه، قیصاری ناقانونی فعالیت قیلگنی باعث، توتقونگه آلینگن.
مملکت شمالی و شمالشرق ولایتلریده یولگه قوییلگن ناراضیلیک نمایشلر نیچه کوندن بویان دوام ایتیب کیلماقده، دولتی ادارهلرنینگ ایشلریگه کمچیلیک ایجاد قیلگنی یانیده، بازارده بولگن ایش و کوچ نی قیینچیلیککه روپهره قیلگن.
