په بدخشان کې د نفوسو احوالو ثبت ادارې مسوول حبیب الرحمان سلاموطندار ته وویل چې دوی له کورنیو چارو وزارته ۱۵۰ زره کاغذي پېژندپاڼې غوښتي وې خو د پېژندپاڼو وېش بهیر له پیل راهیسې ۷۰ زره پېژندپاڼې دې ولایت ته رسېدلي چې دمګړۍ دغه پاڼې ختمې شوې دي.
د نوموړي په وینا، د پېژندپاڼو له ختمېدو ۱۵ ورځې تېریږي خو تراوسه دوی ته نوې پاڼې نه دي رسیدلې.
د ولسي جرګې غړې فوزیه کوفي وايي چې د بدخشان په زیاتره سیمو کې کاغذي پېژندپاڼې ختمې شوې او که حکومت دې مسلې ته پام ونه کړي د ټاکنو سلامت او د ټولو ګډون به تر پوښتنې لاندې راشي.
مېرمن کوفي له حکومته وغوښتل چې ژرترژره دې دا ستونزه حل او د دې ولایت اوسېدونکي دې له خپله حقه نه بې برخې کوي.
د بدخشان ولایتي شورا غړی عبدالله ناجي نظري وايي حکومت هغو ولایتونو ته چې کم نفوس لري له ۲۰۰ تر ۳۰۰ زره پاڼې لېږلي دي.
د ښاغلي نظري په وینا، دا مسله د دې ښکارندويي کوي چې حکومت بدخشانیان له خپل سیاسي امتیازه څنډې ته کوي او غواړي راتلونکې ټاکنې پلان کړي.
د بدخشان سیمهییز مسوولان وايي د کاغذي پېژندپاڼو وېش بهیر له پیل راهیسې نږدې ۹۵ زره پېژندپاڼې د رایه ورکونې پر شرایطو برابرو کسانو ته وېشل شوې چې له دې ډلې ۴۶ زره يې نارینه او ۴۹ زره يې ښځینه جوړوي.
