افغانستان حکومتی و پاکستان‌لیک طالب‌لر نماینده لری اوچره‌شگنی‌دن بیرکون کیین، بیرقطار میدیانینگ اعتبارلی منبع‌دن نقل قیلیب گزارش بیریشیچه، ایکی تامان اوشبو مذاکره جریانیده بیری- بیراوی اوستیگه هجوم اویوشتیرمسلیک‌که کیلیشگنلر.
بو میدیا مذاکره اشتراک چیلریدن نقل قیلیب یازیشیچه، ایکی تامان کیچیک- کیچیک هجوم‌گه دقت قیلمه‌یدی.
باشقه تاماندن، افغانستان جمهور رییسی اشرف غنی، اوتکن سه‌شنبه کون ایتیشیچه، افغانستان حکومتی یخشی موقف‌ده بولیب طالب‌لر بیلن سوزلشه‌دی.
اشرف غنی‌نینگ کوپه‌یتیریشیچه، ، بیرینچی‌دور تینچ‌لیک مذاکره‌سیده، بو اولتیریش دواملی لایحه‌گه اوزگریشی، ایشانچ بیلدیریش و اونملی موضوع‌لر تیزیمی اوستیگه بحث اوتکزیلیشی ممکن.
جمهور رییس، مملکت‌ده تینچ‌لیک تامین‌لنیشی‌گه زمینه یره‌تیش توغری‌سیده ملی، منطقه و خلق ارا جماعه‌سی اوستیگه تأکیدلب ایتیشیچه، بین الافغانی تینچ‌لیک سوزلشوولری افغانستان تامانیدن باشقریله‌دی.
اوشبو اوچره شووده جمهور رییس‌نینگ ایتیشیچه، بیزلرنی مقصدمیز بیرینچی باسقیچ ده قیناق لیک‌نی کمه‌یتیره‌میز و سونگی باسقیچ‌ده اورته‌دن کوتره‌میز.
باشقه تاماندن، شونینگ‌دیک طالب‌لر بیر خبرنامه ترقه‌تیب یازیشیچه، بوندن کیین اوشبو گروه‌نینگ سیاسی، تشقی و ایچکی مسوولیت‌لری، سیاسی دفتری بوینیگه بوله‌دی.
اوشبو گروه خبرنامه‌سیده کیلیشیچه، « اسلامی امارت سیاسی دفتری بوتون صلاحیت‌گه ایگه، شرایط و حالت‌نی کوزگه توتیب هر وقت و هر ییرده ایستسه، ایچکی و تشقی جانب‌لر بیلن ملی منفعت و اسلام اصولی‌نی کوزگه توتیب مذاکره قیله‌دی و یاهم توخته‌دی».
باشقه تاماندن، افغانستان سابق جمهور رییسی حامدکرزی، طالب‌لر و افغانستان حکومت اورته‌سیده تینچ‌لیک سوزلشوولر باشلنگنینی خوش کوتیب و مملکت‌ده تینچ لیک تأمین‌لنیشی خصوصیده ایجابی آدیم‌دیب بیله‌دی.
شونینگ‌دیک، بیرلشگن ملت‌لر تشکیلاتی‌نینگ افغانستان‌ده‌گی خاص نماینده‌سی نیکولاس هیسم، اوشبو سوزلشوولر باشلنگنینی خوش قرشی‌لب ایتیشیچه، افغانستان‌ده تینچ‌لیک نه‌فقط آرزو بلکیم ضرور دیر.
انه‌شونده‌ی، پاکستان باش وزیری نوازشریف، افغانستان حکومت و طالب‌لر اورته‌سیده رسمی شکلده تینچ‌لیک سوزلشوولر باشلنگنینی خوش قرشی‌لب ایتیشیچه، افغانستان‌ده تینچ لیک تامین‌لنیشی اوچون بو سوزلشوولر دوام ایتیشی لازم.
عین‌حالده، سیاسی ایش بیلرمانلردن بیری وحید مژده‌نینگ سلام وطندارگه ایتیشیچه، پاکستان اولتیریشیده افغانستان تامانی اوشبو مملکت‌ده‌گی چیت ایللیک‌لرگه قرشی اوروش توخته‌تیلیشی اوستیگه تاکید قیلگن. مژده‌نینگ کوپه‌یتیریشیچه، پاکستان بونده‌ی بیر اولتیریش‌لرگه زمینه‌یره‌تیب، امتیاز آلیش‌گه سعی و حرکت قیله‌دی.
بیراق، سیاسی ایش بیلرمانلردن باشقه بیری میاگل وثیق‌نینگ ایتیشیچه، پاکستان اولتیریشی ایجابی پیام بیلن بیرگه بولگن؛ چونکه بو اولتیریشده صداقت باشقه نرسه‌لردن کوره اونملی دیر.
وثیق‌نینگ کوپه‌یتیریشیچه، طالب لر تامانیدن بو اولتیریشده اشتراک ایتکن نماینده لر، بو گروه‌نینگ ناراض کیشی‌لری ایمس، شبهه‌سیز بولر طالب‌لر اورته‌سیده تاثیر تشله‌یدی.
