آوازلرنینگ قیته سنه‌لیشی خصوصیده جمهورلیک ریاستی نامزدلریدن بیرقطاری نینگ اعتراض بیلدیرگنیدن سونگ، بدخشان، قندوز، تخار، پروان، بغلان، سمنگان و باشقه بیرقطار ولایتلرده ملی پولیس، ملی اردو و ملی خوفسیزلیک عسکرلری هاموی تانک‌لر بیلن سیلاو ایرکین کمیسیونی نینگ ولایتی دفترلری اطرافلریده جایلشگنلر.
یقینلیک وبرقرارلیک سیلاو تیمی اوتگن کونی پولیس کوچلری نینگ اعتراضلریگه قرشی فیزیکی حرکتیدن تنقید قیلگن ایدی و شونینگدیک، مملکت سابق جمهور باشلیغی حامد کرزی، بیر اعلامیه آرقه‌لی، پولیس کوچلری نینگ اعتراضچی‌لرگه قرشی ناتوغری حرکت‌لریدن خواطر بیلدیرگن. اونینگ ایتیشیچه، شخصی و سیاسی مقصدلرده قول تاپیش اوچون امنیتی نهادلردن فایده‌لنیش مملکت فایده‌سیگه ایمس و اهالی تامانیدن قبوللنمه‌یدی.
بیرقطار سیاستچی‌لر و حربی ایش بیلرمانلرنینگ سلام‌وطندار بیلن اوتکزگن صحبت‌لریگه ایتیشیچه، پولیس و امنیتی کوچلرنینگ وظیفه‌لری بیللی دیر و پولیس کوچلریدن سیاسی مقصد ده فایده‌لنیش قانونگه قرشی دیر.
ایچکی ایشلر وزیرلیگی نینگ سابق اورین باسری میرزاحمد یارمند نینگ ایتیشیچه، پولیس و باشقه امنیتی کوچلر سیاسی موضوع‌لرگه دخالت قیلگن صورتده، ایشانچ‌لرینی قولدن بیرهدی. اونینگ ایتیشیچه، خوفسیزلیک‌نی تامین‌لش و جنایت‌لرگه قرشی کوره‌شیش پولیس نینگ اساسی وظیفه‌لریدن دیر.
سیاسی و حربی ایش بیلرمانلردن بیری اکبرجان پولاد نینگ ایتیشیچه، افغانستان و اهالی ینگی دموکراسی‌نی تجربه قیله‌دی و سیلاو لایحه‌سیدن حمایت قیلیش نیاز دیر. جناب پولاد گه کوره، امنیتی نهادلر، سیلاو کمیسیونی و اعتراضچی‌لرنی قانونگه قرشی حرکت قیلمهیشلری کیره‌ک.
بوگون "دوشنبه" کابلده خبری ییغین اوتکزگن جمهورلیک ریاستی نامزدلریدن بیری رحمت‌الله نبیل نینگ ایتیشیچه، امنیتی کوچلر کیچیک خطالرنی انجام بیرگن، بیراق حاضرده هم اهالی تامانیدن حمایت ایتیله‌دی. جناب نبیل گه کوره، خلق ارا جماعه‌سی اینقسه ناتو نینگ امنیتی کوچلردن شخصی و سیاسی فایدهلنیشگه توسیق بولیشی کیره‌ک.
عین‌حالده، نماینده‌لر کینگشی اعضالریدن بیرقطاری امنیتی کوچلردن اعتراضچی‌لرگه قرشی فیزیکی حرکت قیلمه‌یشلرینی سوره‌گنلر.
امنیتی کوچلردن سیاسی فایده‌لنیشی خصوصیده، حکومت اینقسه ایچکی ایشلر وزیرلیگی فکرینی آلیش اوچون سعی و حرکت قیلدیک، بیراق موفق بولمه‌دیک.
شونینگدیک، اوتگن کونی کیچ قورون ایچکی ایشلر وزیرلیگی بیرخبرنامه ترقه‌تیب پولیس کوچلری نینگ اعتراضچی‌لرگه قرشی فیزیکی برخوردینی رد قیلگن ایدی. اعلامیه‌گه کوره، امنیتی کوچلر سیلاو لایحه‌سیگه طرف‌سیز قاله‌دی و بو لایحه‌گه دخالت قیلیش اوچون رخصت بیریلمه‌یدی.
