سونگی وقت‌لرده افغانستان دشمنلری کوپراق تعلیم و تربیه آلیش مرکزلری، مسجدلر و تکیه خانه‌لر همده سپورتچی‌لرنینگ مشق و تمرین قیله‌دیگن جایلرینی نشانگه آلیب کیلماقده‌لر. بیز کیینگی هفته‌لر دوامیده بیرگینه پایتخت کابل‌ده مذکور محل‌لر و مرکزلرده بیر قطار ترور هجوملری عملگه آشیریلگنی گه گواه ایدیک. مذکور هجوملرده کوپراق گناهسیز عادی اهالی قربان بولدیلر.
اېنگ سونگی مرته اوتگن «چهارشنبه» کونی قوراللی گروهلر تامانیدن کابل غربیده میوند سپورت سالونی نشانگه آلیندی. واقعه دن بیر آز وقت اوتمه‌ی اوشبو محل گه ییتیب بارگن خبرچی‌لر آره‌سیده پارتلش یوز بیردی. بو ایکی هجوم ده 30 گه یقین سپورتچی و ژورنالیست جمله‌دن طلوع تلویزیونی نینگ ایکی ایشلاوچی‌سی و بیر نیچه کیشی عادی اهالی هلاک بولدیلر.
نا حربی مرکزلرگه ترورچیلرنینگ هجوملری بوندن آلدین هم عملگه آشیریلگن، اما کیینگی آیلر ایچیده مذکور مرکزلرگه ترور هجوملری سانی آشه‌یاتگنی دقتگه سزاوار مسأله حسابلنه‌دی.
خوش، نیگه دشمن تعلیم مرکزلری، سپورت کلوبلری و خلق نینگ عبادت ییرلرینی کوپراق نشانگه آلیب کیلماقده؟ بیر جهتدن بو سوراققه جواب قه‌یتریش اونچه هم قیین ایمس البته. معلوم که ترورچیلر اساساً اهالینی قورقیتیش و اوزلری گه حامی بولگن دولتلر نینگ هدفلری اوچون ترور عملیاتلرینی اجرا ایته دیلر. افغانستان دولتی و خلقی گه باسیم اوتکزیش ترورچیلرینی قوللب قوتلب کیله دیگن دولتلر نینگ اینگ مهم هدفی سنه له دی. باشقه بیر تاماندن قوپاروچیلر نا حربی مرکزلر ده ترور هجوملرینی آسانراق عملگه آشیره دیلر و بونده ی حمله لرده قربانلر سانی کوپراق بوله دی.
کیینگی چاغلرده پایتخت کابل غربیده عموماً شیعه مذهبلی هزاره لر حیات کیچیره دیگن حدود لرده ترور حمله لری عملگه آشیریلیشی دقتگه سزاوار بیر مسأاله حسابلنه دی. مملکت دشمنلری هدفلری نینگ باشقه بیری افغانستان وطنداشلری آره سیده نفاق اویغاتیش دیر. افغانستان نینگ شیعه مذهبلی اهالیسینی دشمنلر تامانیدن نشانگه آلینه یاتگنی هم انه شونده ی بیر شوم هدف اوچون عملگه آشیریله دی. شیعه لر جماعه سیگه قره تیلگن ترور حمله لریده اونلب کیشی گناهسیز انسانلر قربان بولدیلر. حاضرگی کونده افغانستان خلقی، مملکت دشمنلری نینگ هدفلرینی یخشی انگلب آلگنلر. اولر نینگ بیز نینگ وطنداشلریمیز آره سیده نفاق و فتنه اویغاتیش نیتیده عملگه آشیرگن هجوملری خلقیمیز ارا اوتمیشدن موجود بولگن بیردملیک نی بوزه آلمه‌گن.
هر حالده ترور چیلرنینگ عادی اهالینی نشانگه آلیب عملگه آشیره دیگن حمله لری سانی آشیب بارماقده. بو هجوملر نتیجه سیده خلق آره سیده قربانلر سانی هم کوتیلمه گن پیمانه ده آشگن.
کشف و امنیت ارگانلری ترور هجوملری نینگ آلدینی آلیشده ضعیف عمل قیله دیلر. بو نرسه دولت نی میلیونلب کیشی اهالی امنیتی نی تأمینلشده ناکام لیگی نینگ دلیلی حسابلنه دی.
کشف و امنیت ارگانلری نیگه ترور هجوملرینی نینگ آلدینی آلیش همده قوپاروچیلر گه قرشی کوره‌ش ده مؤفق عمل قیله آلمه یپتیلر؟ افغانستانلیکلر ذهنیده موجود بولگن بو سوال گه هلی قانیقرلی جواب تاپیلمه گن. اوشبو سوراققه دولت نینگ بلند مرتبه لی عملدارلری اینیقسه امنیت ارگانلری مسووللری جواب تاپیشلری کیره‌ک.
افغانستان نینگ کشف و امنیت اداره لرینی متخصص و تعلیم کورگن ایشلاوچیلر بیلن تأمینلش و اولرنینگ سانی نی آشیریش؛ مذکور ارگانلرنی زمانوی قوراللر بیلن جهازلنتیریش، یخشی عمل قیلگن ایشلاوچلر و عملدارلرنی مادی و معنوی جهتدن تشویق و ترغیب ایتیش آرقه‌لی گینه اوشبو ارگانلرنینگ قوپاروچیلیک‌که قرشی کوره‌شی مؤفقیتی‌نی کفالت قیلیش ممکن بوله‌دی. بو مسأله گه افغانستان دولتی رهبرلری دنیا جماعه‌چیلیگی اینیقسه رواجلنگن همکار دولتلر یاردمینی جلب ایتیش‌لری ضرور.
باشقه بیر تاماندن دنیا جماعه‌چیلیگینی ترورچیلیککه قرشی کوره‌ش ده آلدینگی دن کوره فعال راق قتنه‌شیب مذکور جبهه ده جدی بیر شکلده فعالیت کورسه‌تیشی اوته مهم. دنیا بویلب ترورچیلرگه قرشی کوره‌ش ده اشتراک ایتیب کیله‌دیگن دولتلر اوشبو یونه‌لیش ده اوز تکتیکلرینی اوزگرتیریشلری و قیته کوریب چیقیشلری گه هم جدی احتیاج سیزیله‌دی. چونکه بوکونگه چه مذکور دولت‌لرنینگ ترورچیلیککه قرشی کوره شی کوتیلگن نتیجه‌لر آلیب کیلمه‌گن.
افغانستان دولتی و حربی کوچلری دنیا اهالیسی امنیتی‌نی تأمینلش اوچون خلق ارا ترورچیلرگه قرشی کوره‌ش جبهه‌سی نینگ بیرینچی چیزیغیده اوروشیب، قربان بولماقده‌لر. دنیا دولت‌لری افغانستانلیک‌لرنینگ اوشبو جبهه ده قان توکیب جان بیریشلری قدری گه ییتماقلری ضرور. دنیا جماعه‌چیلیگی افغانلر جانی‌نینگ قدر و قیمتی دنیانینگ باشقه دولت‌لری جانی و قانی دن ارزان بولمه‌گنینی انگلشلری کیره‌ک.
موجود شرایط ده اوز ارا اختلاف‌لر و کیلیشماوچیکلرگه قره‌مه‌ی، افغانستان سیاستچیلرینی ترورچیلرگه قرشی کوره‌ش‌ده بیر یاقه‌دن باش چیقریب بیرگه‌لیک‌ده عمل قیلیشلری ضرور. افغان سیاستچیلری و تورلی اجتماعی گروهلرنی مذکور جبهه ده بیر-بیرلری‌نینگ یانیده توریشلری افغانستان کیله‌جگینی کفالتله‌یدی. عکس حالده یاووز دشمن، بیزگه رحم قیلمه‌یدی. همه میزنینگ بیر یاقدن قیریب نابود ایتیش‌دن باش تارتمه‌یدی.
حاضرگی وضعیت بوتون افغانستانلیک‌لرنی قیسی بیر قوم و منطقه گه قره‌شلی بولمه‌سین هر بیر زمانگه کوره سیرگگ و هوشیار بولیش‌لیک‌که چقیره‌دی.
