.PNG)
د بښنې نړېوال سازمان په خپل تازه راپور کې ليکلي، چې په اوس وخت کې د جګړو او ناامنیو له امله د افغانستان په بېلابېلو ولايتونو کې ۱،۲ میلیونه افغانان په کور دننه بې ځایه شوي دي.
د دغه راپور پر بنسټ د کورنیو بې ځایه شویو شمېر په ۲۰۱۳ م ز کال کې ۵۰۰ زره کسان وو، چې اوس د دغه شمېر دوه برابره بې ځایه شوي دي.
د یاد سازمان څېړونکو د کابل، هرات او بلخ په ولایتونو کې د بې ځایه شویو هېوادوالو حالت څېړلي او په دې ولایتونو کې یې له سلګونو کورنیو سره مرکې کړي دي.
د دغه سازمان موندنې ښيي، چې د بې ځایه شویو خلکو حالت د تېرو کلونو په پرتله په خراب حالت کې دی.
د بښنې نړېوال سازمان د اسیا برخې مسوولې چامپا پاتیل نن (سه شنبې) په کابل کې جوړې شوې غونډه کې د افغانستان بې ځایه شویو په اړه د نړۍ له نه پاملرنې اندېښنه وښودله او زیاته یې کړه، چې د بې ځایه شویو کورنیو حالت ته نه پاملرنې د دغو کډوالو ژوند ستونزمن کړی دی.
.PNG)
پاتیل وویل، چې د حکومت د ژمنو سره سره بې ځایه شوي کډوال د استوګنې ځای، خوراکي توکو، اوبو او زده کړو له کمښت سره مخامخ دي.
مېرمن چامپا پاتیل زیاته کړه، سره له دې چې افغان دولت د کورنیو بې ځایه شویو په اړه په ۲۰۱۴ م ز کال کې یوه جامع طرحه تصویب کړه، خو په دولت کې د شته فساد او د ظرفیتونو د نشتوالي له امله تر اوسه هم دغه پالیسې عملي شوې نه ده او حکومت هم د دې پالیسي د پلي کولو له پاره بودیجه نه لري.
د دغه سازمان د اسیا برخې مسووله وايي، که افغان حکومت د کورنیو بې ځایه شویو ستونزو ته جدي پاملرنه ونه کړي، نو دغه ستونزې به ناورین رامنځته کړي.
د دې سازمان بل څېړونکي اولف بولم ویس، چې د بې ځایه شویو سره یې له نږدې خبرې کړې وې وویل، چې د ځای او خوراکي توکو نشتوالی د بې ځایه شویو کورنیو له جدي ستونزو دي او دوی وايي، چې له دې حالت نه زندان ورته ډېر ښه دی.
د افغانستان د کورنیو بې ځایه شویو په استازیتوب محمد حسین، چې له بدخشان ولایت نه کډه شوی دی، په دې غونډه کې وویل، چې د هرې ورځې په تېرېدو سره یې ستونزې زیاتېږي.
دی وايي، چې د خوراکي توکو، د استوګنځای، د اوبو کمښت او د ښوونې او روزنې اسانتیاوو نشتوالی د دوی له جدي ستونزو بلل کيږي.
