جونا کونټا د ټینس لومړۍ اتلولي وګټله

د انګلستان لومړۍ مقام لرونکې ښځینه ټینس لوبغاړې جونا کونټا د لومړي ځل له پاره د ښځینه ټینس نړیوالو سیالیو پاې لوبه کې اتله شوه.

نوموړې په دې لوبه کې خپل امریکايۍ سیالې ته ماته ورکړه.

د ښځینه ټینس "ډبلیو، ټي، ای" جام فاینل لوبه د امریکې په سنفورډ-کلیفورنیا ایالت کې ترسره شوې.

انګلستانۍ کونټا د لومړۍ اتلولۍ له پاره وینس ویلیمز ۶ د ۲ امتیازونو په وړاندې له ماتې سره مخ کړه او د اتلولۍ جام یې ترلاسه کړ.

جونا کونټا یو کال وړاندې د ښځینه ټینس په نړیواله درجه بندۍ کې په ۱۴۷ م مقام کې وه، خو په وروستۍ اتلولۍ سره نن د ټینس نړیوالې شورا لخوا اعلان شوه، دغه لوبغاړې له ۱۸ م مقام څخه ۱۴ م مقام ته ورسېده.

کونټا رسنیو سره په خبرو کی وویل، د وینس ویلیمزخلاف یې هر شارټ له چیلینج څخه ډک و او هڅه یې وکړه، چې هره هڅه کې بریالۍ شي.

دغه راز نوې انګلستانۍ لوبغاړې کونټا خلاف د ماتې وروسته وینس ویلیمزرسنیو ته وویل، کونټا زما خلاف بهترینه لوبه وکړه.

په دې سیالیو کې لسګونه لوبغاړو په انفرادي او ټیمي توګه برخه اخیستې وه، چې په ګټوونکو لوبغاړو د سیالیو په پاې کې ټولټال ۷ لکه او ۳۱ زره امریکایي ډالره ووېشل شول.