جوزجان ولایت عمومی تورمهسینینگ معاونی عبدالمحمد بوگون 17- حوت شبرغان شهریدهگی عمومی قماقخانهنی یقیندن کوریش اوچون بارگن بیر پیتده قطار محبوسلر تامانیدن کلتکلهنیب هلاک ایتیلدی.
جوزجان پولیس ادارهسینینگ قوماندانی فقیر محمد جوزجانینینگ سلام وطندارگه ایتیشیچه، محبوسلر سمنوال عبدالمحمدنی کوزینی چیقاریب اولدیرگنلر.
اوز نامی فاش ایتیلیشینی ایستمهگن بیر محبوس نینگ سلام وطندارگه بیلدیریشیچه، تورمهنینگ قطار ملازملری کوزدن یاش چیقرووچی گازنی ایشگه سالیب تورمهگه کیرگنلر. قماقخانه ملازملرینینگ تورمهگه بارگنلریدن مقصد ایریم سیاسی محبوسلرنی کابل پلچرخی تورمهسیگه یوباریش بولگنی ایتیلهدی.
مذکور محبوسگه کوره، تورمه ملازملری محبوسلر تامانیدن عکسالعملگه روپه ره بولگن بیر پیتده تورمه قوریقچیلری محبوسلرگه قرهته اوق اوزگنلر. نتیجهده بیر محبوس اولگن و باشقه 25 محبوس یرهلنگن.
اونینگ سوزلریگه کوره، اوشبو اوق اوزیشدن سونگ محبوسلر تورمه قوریقچیلریگه هجوم قیلیب، عاقبتده قماقخانه اورین باسری عبدالمحمدنی هجوم آستیگه آلیب اولدیرگنلر. ایتیلیشیچه، تورمه نینگ ایکّی ملازمی محبوسلر آرقهلی گروگان آلینگن.
لیکن، جوزجان ولایت امنیه قوماندانی اوشبو سوزلرنی رد قیلیب ایتیشیچه، حادثه یاروتیلیشی اوچون پولیس تیکشیروو ایشلرنی باشلهگن.
جوزجان عمومی تورمهسیده 670 کیشی محبوس سقلنهدی اولردن 70 تهسی عیاللر بولگنی ایتیلهدی.
بوندن نیچه مدت آلدین هم مذکور تورمه نینگ قطار محبوسلری دوسیهلری دولت تامانیدن تیکشیریلمهگنلیگی سبب آچلیک اعلان قیلیب، آغیزلرینی تیککن ایدیلر.
