یوه امنیتي سرچینه چې نه غواړي نوم یې واخېستل شي وايي، طالبانو د تېلو او ګازو څو ټانکرونه د جوزجان ـ بلخ له لویې لارې بیولي او هر لېټر تېل یې د ۳۰ افغانیو په بدل کې پر خلکو پلوري.
د سرچینې په وینا، طالبانو تراوسه ۸ د تېلو او ګازو او دوه هم باروړونکي موټر له ځانه سره بیولي دي.
د جوزجان یو شمېر اوسېدونکي او د ولایتي شورا غړي وايي، طالبانو تازه د تېلو او ګازو څو موټر تښتولي او تېل یې په ډېره کمه بیه پر خلکو پلورلي دي.
د جوزجان د ولایتي شورا غړی شیرمحمد نور او د جوزجان اوسېدونکی قادر پولاد وايي، طالبانو څو ځله له خانقاه ولسوالي، د اقچې له عمومي سړک او په دې وروستیو کې د فیضاباد له سیمې د تېلو او ګازو ټانکرونه بیولي چې دې کار سوداګر او پانګوال اړ کړي چې له پانګونې لاس واخلي.
اړوند مطالب:
سانچارک؛ طالبان په خلکو په زوره دولتي ځمکې پلوري
طالبانو سمنګان کې له ۵۰ ډېر موټرچلوونکي ځان سره وړي
د جوزجان ـ بلخ په لویه لار کې د تېلو او ګازو یو شمېر موټرچلوونکي وايي، ناسم امنیتي وضعیت او له دوی نه باج اخېستو سخت اندېښمن کړي دي.
په همدې حال کې د جوزجان د والي ویاند فریدون انیق وايي، طالبان پر یاده لویه لاره د خپل حضور څرګندولو او له شرکتونو نه د باج اخېستو لپاره دا ډول کار کوي، خو ډاډ ورکوي چې روان وضعیت به ښه شي.
خو د طالبانو ویاند ذبېحالله مجاهد د دغو څرګندونو د اثبات لپاره په دې برخه کې د څېړنو پیلولو خبر ورکوي.
