په نږدې څوو ورځو کې د تخار په بهارک ولسوالۍ کې د طالبانو حضور زیات شوی او د دې ډلې کسان د ولسوالۍ مرکز ته نږدې په څو کیلومترۍ کې له امنیتي ځواکونو سره په جنګ اخته دي.
د امنیتي ځواکونو او طالبانو ترمنځ جنګ د دې لامل شوی چې د بهارک ولسوالۍ د ۴کلیو اوسېدونکي خپل کورونه پرېږدي.
د ملمې کلې اوسېدونکي محکم تاش هغه وروستی شخص دی چې د جنګ له امله یې خپل کور پرېښی دی. هغه وايي چې د سیمې خلکو خپل کورنه پرېښې دي او امن سیمو ته تللي.
د بهارک ولسوال فیضالرحمان حیدري وايي، د تېرو دوو ورځو جنګونو شاوخوا ۶۰۰ کورنۍ بېځایه کړېدي.
د تخار د ملي امنیت رییس ډاکټر ګلستان سلاموطندار ته وویل چې طالبان په تېرو دوو ورځو کې د بهارک ولسوالۍ په شاوخوا کلیو کې ځای پرځای شويوو؛ خو د امنیتي ځواکونو په بېګاني برید کې ۱۵ طالبان ووژل شول او ۲۰ نور ټپیان شول چې له همدې سره یادې ډلې د اوس لهپاره شاتګ کړیدی.
د ښاغلي ګلستان په وینا، د طالبانو ترلاس لاندې سیمې اوس د امنیتي ځواکونو په لاس کې دي.
د تخار د ملي امنیت رییس وايي، په تېرو دوو ورځو کې د طالبانو د مرستې لهپاره بهارک ولسوالۍ ته د کندوز له دشتارچي او اقتاش ولسوالیو نه لسګونه طالبان ورغلي وو چې قومانداني یې د تخار لهپاره د طالبانو د نومول شوي والي د معاون پر غاړه وه.
په ورته وخت کې نن د تخار ولایتي شورا وکیلانو هم په یوې خبري غونډې کې پهدې ولایت کې د طالبانو د جغرافیوي پراختیا په تړاو اندېښنه څرګنده کړې او له حکومت نه یې په تخار ولایت کې د طالبانو د ځپلو لهپاره د پراخو عملیاتو د ترسره کېدو غوښتنه کړې.
