افغانستان جمهور رییسی‌نینگ بیرینچی اورین باسری ایکی آی‌دن بیری شمال ولایت‌لری جمله‌دن فاریاب، سرپل و جوزجان‌نی طالب‌لردن تازه‌لش اوچون اوتکزیله‌دیگن حربی عملیات‌لرنی توغری‌دن باشقریب کیلماقده. او یقین‌ده میدیا گه ایتگن گپ‌لری‌ده افغانستان ملی بیرلیک حکومتی رهبریتی‌دن ناراضی ایکن‌لیگی‌نی آچیق بیر شکلده بیان ایتدی.
جنرال دوستیم ملی بیرلیک حکومتی رهبرلری (داکتر محمد اشرف غنی و داکتر عبدالله عبدالله) لرنی حکومت ترکیبیده مملکت اوزبیک‌لری‌نینگ ایش بیلرمان کادرلری‌نی جایلشتیرمه‌گن لیک‌لریدن شکایت قیلدی. دوستم، هلی‌گچه حکومت رهبریتی‌گه قرشی بونچه جدی گپ‌لرنی تیلگه آلمه‌گن.
دوستیم‌نینگ بوکونگچه یوره‌گیده اسره‌ب یورگن سوزلرینی تیلگه آلیشی‌گه جمهور رییس محمد اشرف غنی‌نینگ خارج سفری‌ده بولگنی‌ده مملکت‌نی باشقریش اوچون دوستیم‌نی سرپرست تعیین ایتمه‌گنی اینیقسه جمهور رییسی سوزچی‌لریدن بیری‌نینگ اشرف غنی‌نی خارج‌دن توریب هم افغانستان‌نی باشقریب باره‌دی دیگن گپلری مجبور ایتگن بولیشی ممکن.
معلوم‌که اشرف غنی بوکونگه‌قدر اوزی خارج‌گه آتلنگنده رسمی روشده مملکت اوچون سرپرست تعیین‌له‌مه‌گن. حال بوکه، سابق جمهور رییس حامد کرزی بیر کون اوچون چیت ایل‌گه کیتسه هم بیر فرمان اساسیده، مملکت اوچون سرپرست تعیین‌لب کیتردی.
جنرال دوستیم اوز اعتراض‌لری‌ده حکومت‌نینگ بلند مرتبه‌لی لوازم‌لریده مملکت اوزبیک‌لری‌گه مناسب اورین‌لر بیریلمه‌گنی‌نی تاکیدله‌دی. بیر جهتدن آلیب قره لگنده دوستیم نینگ اعتراض لری اوز منطقی گه ایگه. بیر جهتدن آلیب قره‌لگنده دوستیم‌نینگ اعتراض‌لری اوز منطقی‌گه ایگه. دوستم طرفدارلری جمهور رییس‌لیک سیلاولریده محمد اشرف غنی‌نی جمهور رییس‌لیک مقامی‌گه کوتریلیشی‌گه کته رول اوینه‌گن‌لر. در حقیقت دوستیم سیلاولرده اشرف غنی یانیده توریب اونی قوللب قوتله‌مه‌گنده ایدی، جناب غنی‌نی حاضرگی موقع‌گه کوریش ممکن بولمسدی.
باشقه بیر تاماندن، اشرف غنی اوزی‌نینگ سیلاولر جریانیده بیرگن مهم بیر شعاری "هیچ بیر افغان باشقه بیر افغان‌دن کم ایمس" دیگن شعاری‌نی عملده تطبیق ایته‌آلمه‌گن.
حاضرگی کونده وزیرلیک‌لر ترکیبیده اوزبیک‌لر نماینده‌لری کم‌دن کم کوزگه تشلنه‌دیلر. بیرگینه تشقی ایشلر وزیرلیگی‌ده فعالیت آلیب باره‌دیگن ایلچی‌لر و قونسل‌لر ترکیبی‌گه بیر نظر تشلنگن‌ده مساله اوز اویدن عیان بوله‌دی. افغانستان خارج مملکت‌لرده‌گی 37 ایلچی‌لری‌نینگ کته قسمی‌نی پشتون‌لر و تاجیک‌لر تشکیل ایته‌دیلر. مذکور ایلچی‌لر آره‌سیده فقط ایکی نفری اوزبیک.
جنرال دوستیم‌نینگ سونگی سوزلری افغانستان حکومتی رهبریتی‌ده نه قدر معما بارلیگی‌نی اوز اویدن فاش ایته‌دی.
سیلاولردن آلدین، اشرف غنی و جنرال دوسیتم " قاوورسه قانی و ساوورسه سامانی" قوشیلمه‌یدیگن شخصلر ایدی‌لر. هم ایدئولوژیک جهتی‌دن و هم باشقه بیر تاماندن بو ایکی سیمانی بیر- بیری‌گه یقینله‌شیشی اوچون دلیل یوق ایدی.
اما سیاست ایجابی و سیلاولر مجبوریتی اساسیده، اشرف غنی، جنرال دوستیم‌نی اوز بغیری باسدی.
حامد کرزی دوری‌ده جنرال دوستیم‌نی اینگ کوپ یاقتیرمه‌یدیگن سیمالردن بیری محمد اشرف غنی ایدی.
سیاست اساساً اویین. اونده اخلاققه اورین یوق. اشرف غنی شو بوکونگه‌قدر جنرال دوستیم بیلن سیاست اوینه‌دی و دوستیم ایسه بوکونگه‌قدر اخلاققه سویه‌نیب کیلدی.
جنرال دوستیم، محمد اشرف غنی بیلن سیلاولر کمپاینی باشلنمس‌دن آلدین، سیاست قیلیشی کیره‌ک ایدی. حاضرگی کونده افغانستان ملی بیرلیک حکومتی دوری‌دن ایکی ییل اوتیب بارماقده. ایکی ییل‌دن سونگ، ایتیلگن گپلری باشقه بیر شکلده معامله‌نینگ باشلنیشی‌ده ایتیلیشی کیره‌ک ایدی.
افغانستان‌ده اوزبیک‌لرنینگ سیاسی رهبریتی‌نی هردایم سیاست اویینی‌ده بای بیریب کیلگن‌لیک‌لر اوزبیک سیاستچی‌لری تامانیدن تنقید ایتیلیب کیلینه‌دی. جنرال دوستیم‌نی کیچیک و ارزیمه‌یدیگن امتیازلردن خرسند بولیشی هم کته کیچیک اوزبیک‌لر آره‌سیده گپ – سوز بولیب یوره‌دی.
خوش دوستیم‌نینگ سونگی اعتراضلی چیقیش‌لری قنده‌ی نتیجه‌لر گه آلیب کیلیشی ممکن؟ بو قبیل اعتراض‌لر و شکایت‌لر اوزبیک‌لرنینگ قیسی بیر دردی‌گه دوا بوله‌آله‌دی؟ گرچند بو سوال‌لرگه زمان اوتیشی مناسب و درست جواب بیرسه- ده، بو توغری‌ده کوپ نرسه‌لرنی آلدین‌دن ایتیش هم قیین ایمس البته.
بیرینچیدن، جنرال دوستیم‌نینگ اوز فرزندلری‌گه مدال آلگنی کبی ینه بیر کیچیک امتیاز آلیشی بیلن بیر قنچه وقت‌گچه جیم کیتیشی احتمال‌دن ییراق ایمس. عکس حالده 80- ییل‌لر آخری کبی حکومت‌نی جدی تهدیدلرگه روپه‌ره قیلیش دوری ایمس. حاضرگی کونده ناتو و غرب دولت‌لری افغانستان وضعیتی‌نی کوزه‌تیب اونی جدی بیر شکلده باشقریب کیلماقده. اولر راضی‌لیگی‌سیز حکومت‌گه قرشی هر قنده‌ی حرکت‌نی نتیجه آلیب کیلمس‌لیگی و اوز جایی‌گه باستیریلیشی هر بیر عقل‌لی انسان اوچون جومباق ایمس.
هر حالده بوکونگچه افغانستان اوزبیک‌لری حکومت‌ده اوزلری‌گه مناسب اورین‌لرگه ایگه بوله‌آلمه‌دیلر. و هر دایم او و یا بو تاماندن فقط سیلاولر دوری‌ده استفاده ایتیلدیلر. بیرینچی بار اوزبیک خلقی‌دن بیر کیشی (جنرال دوستیم) نی افغانستان‌نینگ ایکینچی سیاسی آدمی بولیب مهم بیر لوازم‌گه کوتریلیشی اتنیک اوزبیک‌لر آره‌سیده کته امید اویغاتگن ایدی. بوکونگه کیلیب اوشبو امیدلر پوچگه چیقماقده. بو معمانی فقط مقابل تامان‌نی تنقید ایتیش آرقه‌لی برطرف ایتیب بولمه‌یدی. مسئله‌نینگ هر بیر تامانی‌نی چقور راق اورگنیب، کیله‌جک‌لر اوچون اساسی قدملر تشله‌ماققه احتیاج سیزیله‌دی.
