افغانستانده خلق ارا کوچلری نینگ عمومی جنرال جان کمپبل بوگون کابلده ولایت لر امنیه قوماندانلری اوچون یولگه قوییلگن اوچ کونلیک سیمینار نینگ آچیلیش مراسمیده قیلگن چیقیشده افغان ملی کوچلری باشلنه جک ینگی اوروش اوچون تیارگرلیک کوریش لری باره سیده تاکیدله گن. کمپبل نینگ ایتیشیچه، افغانستان ملی کوچلری اوتگن عملیات لر اینیقسه حاضرگی کونده هلمند ولایتیده اوته دیگن حربی عملیاتلردن تجربه آلیشی لازم. شونینگ دیک جنرال جان کمپبل ناتو افغان ملی کوچلرینی حمایت قیلیشی نی بیلدیریب، خلق ارا کوچلری افغان ملی حربیلرینی یالغوز قالدیرمس دن اوز حمایت لریگه دوام ایته دی دیگن.
ییغینده، افغانستانده خلق ارا کوچلری نینگ عمومی قوماندانی جنرال جان کمپبل قوشیمچه افغانستان ملی بیرلیک حکومتی نینگ اجراییه باشلیغی داکتر عبدالله عبدالله، ایچکی ایش لر وزیری نورالحق علومی، ملی امنیت اداره سی باشلیغی رحمت الله نبیل، ملی مدافعه وزیرلیگی سرپرستی عنایت الله نظری و ولایت لر امنیه قوماندانلری قتنشگنلر.
سیمینار افغانستان بویلب امنیه قوماندانلر حربی قابلیتلرینی آشیریش نیتده یولگه قوییلگن لیگی ایتیله دی. ملی بیرلیک حکومتی نینگ اجراییه باشلیغی عبدالله عبدالله، ملی اردو کوچلری افغانستان ییر بوتونلیگی همده ملی منفعتلرنی سقلش بیلن مملکت خلقی تینچ یشش لری اوچون فدالیک قیلیشلرینی ایتگن.
جناب عبدالله مذکور سیمینار ولایتلر امنیه قوماندانلری قابلیتلرینی آشیریشده یاردم بیریشی خصوصیده امیدوارلیک قیلگن. افغانستان ایچکی ایشلر وزیری نورالحق علومی قیله جک بیرینچی ایش لر اوستیده توخته لیب بیلدیریشیچه، طرف سیز قانون همه اوچون تطبیق ایتیلیشی، انسان حقلری تامین قیلینیشی و افغان ملی کوچلری بیلن اهالی اورته سیده علاقه نی مستحکم لش، پولیس قابلیتی نی آشیریش، مملکت چیگره حدودلرینی حفاظت ایتیش، مکافات و مجازات رعایت قیلینیشی و افغان ملی کوچلری صفیگه خاتین قیزلر سانینی آشیریش کبی موضوع لر ایچکی ایش لر وزیرلیگی نینگ بیرینچی باسقیچ ده قیله جک ایش لریدن دیر.
جناب علومی سوزلریگه قره گنده، مملکتده ترورچی گروه لر جمله دن حقانی، طالب لر و داعش فعالیت ایته دی. وزیرلیک مذکور گروه لر فعالیتی آلدی آلینیشی اوچون ایریم تدبیرلرنی قولگه آلگن. عین حالده، جناب علومی اوشبو سیمینار ترورچی لر فعالیتی آلدی آلینیشی اوچون کیله جک لرده ایجابی تاثیر قوییش حقیده امیدوارلیک قیلگن.
مراسمده چیقیش قیلیب نطق سوزله گن ملی مدافعه وزیرلیگی سرپرستی عنایت الله نظری، خلق ارا کوچلر رهبرلیگیده ینگیدن افغان ملی کوچلرینی کیسکین حمایت قیلیش نامیده گی ماموریتدن منتدارچیلیک قیلیب، افغان ملی کوچلری دنیا جماعه چیلیگی تامانیدن هر تامانلمه حمایت ایتیلیشینی سوره گن. شونینگ دیک افغان ملی کوچلری هر قنده ی تهدید اوچون تیار ایکن لیک لری باره سیده سوزله گن ایچکی ایش لر وزیرلیگی امنیتی مسله لر بوییچه اورین باسری جنرال بصیر سالنگی، ملی کوچلر دشمن نینگ هر قنده ی تهدیدی اوچون تیار ایکن لیگیدن سوز بیرگن.
سونگی بیر نیچه کون ایچیده افغانستان نینگ ایریم ولایت لریده داعش گروهی نینگ اعضالری فعالیت گه باشله گن لیگی خصوصیده خبر لر ترقه تیلماقده. مذکور خبر لر مملکت اهالیسی نی جدی خواطریگه سبب بولیشگن. انه شو سبب افغانستان ایچکی ایش لر وزیرلیگی عاموی اخبارات واسطه لریدن مملکت ده داعش گه عاید هر قنده ی خبرنی ترقتمس لیک لرینی سوره گن.
