اشرف غنی افغانستان جمهور رییسی ایران جمهور رییسی نینگ اورین باسری محمد شریعت‌مداری بیلن اوچره شگنده، ایران جمهور رییسی حسن روحانی نینگ رسمی چقریقی بیلن تیزلیکده بو اولکه گه باریشی‌نی بیلدیردی.
بو اوچره شووده جمهور رییس غنی، تروریستی گروهلر تانیش و اولر علیهده بیرلیک‌ده کوره شیش، بنگیوار ماده لری نینگ قاچاق قیله دیگن‌لر علیهده کوره شیش، اقتصادی و ترانزیتی یاردملیک‌لر، قانونی سوداگرلیک شیوه لرینی اوستیریش، افغان قاچقین‌لر نینگ قیین‌چیلیک‌لرینی حل ایتیش و سوو بولیمیده یاردملش توغری سیده سوزلشدی.
جمهور رییس غنی ایران جمهور رییسی نینگ اورین باسری بیلن سه‌شبنه 28 دلو ده اوچره شیب، منطقه بوییچه تروریزیم قرشی سیده افغانستان و ایران بیرلیک‌ده کوره شه‌دی دیدی.
ایش بیلرمانلر؛ جمهور رییس غنی نینگ ایران تاماندن چقیریلگنیدن هدف، سیاسی و اقتصادی مساله لر اوچون سوزله شیش دیدیلر.
سیاسی ایش بیلرمان داکتر آصف بیکتاش، بو توغریده سلام وطنداربیلن سوزلشگنده، تاپی گاز پروژه سی نینگ باشلنیشی بیلن سوزله شیشلر باشله نیشی، ایراننی هم افغانستان بیلن اقتصادی مناسبتلرینی یوکسلتیریش اوچون اویغتگن و «چابهار طریقیدن اقتصاد بولیمی‌گه اوزی و افغانستان‌گه یاردم بیریش یول‌لرینی قیدیره دی» دیدی.
بیکتاش گه کوره جمهور رییس نی ایران کیتیشی بو اوچون مهم دیرکی؛ اشرف غنی فکریده قوشنی اولکه لر بیلن یخشی مناسبت قوریش کوپراق تاکید بولگن.
او؛ جمهور رییس باشقه مساله لر یانیده ایرانده‌گی افغان قاچقین‌لری نینگ قیین‌چیلیک‌لرینی حل ایتیش اوچون هم بو اولکه مقاماتی بیلن سوزلشسه دیب کوپه یتیره‌دی.
بیکتاش گه کوره ایران «ینگی یوزه گه کیلگن داعش تروریستی گروهی فعالیت‌لریدن هم خواطرکورستگن لیگی‌نی جمهور رییس غنی بیلن شریک قیله‌دی، تا افغانستان توپراغیدن ایرانگه هجوم ایلتیلمس‌لیک ایشانچینی قولگه کیلتیرسه».
شونده‌ی بین الملل رابطه لری توغری سیده ایش بیلرمان جمال‌الدین بدر هم باید ایران بیلن افغانستان‌نی رابطه سی اسلامی اولکه لر عنوانیگه سقلنسه دیدی.
جمال‌الدین بدر سلام وطندار بیلن سوزلشگنده، ایران بیلن رابطه قوریش‌نیازی بارلیگینی بیلدیره‌دی و «بو رابطه لریمیز باشقه لرنی ضعیف قیلیش اوچون بولمه سین» دیدی.
بدر جمهور رییس نینگ ایرانگه کیتیشی‌نی خوش قرشیلیدی و اوندن هم کوره مهمی باید اقتصادی یاردملیک یوتوقلرینی قولگه کیلتیرالسک دیدی. «هر بیر اولکه اوز منفعتی اوچون اویلیدی. اگر بیز چین بیلن علاقه ده بوله میز، ایران هم بو ایشیمیزگه تفاهم قیلسه».
اونگه کوره ایران، تشقی لیکلرنی منطقه ده بولیشینی چیده آلمیدی؛ اما ینه هم افغانستان بیلن علاقه سی‌نی دوام دار بولیشینی ایسته یدی.
سه‌شنبه کونی ده‌گی افغانستان جمهور رییسی بیلن ایران جمهور رییسی نینگ اورین باسری ارا بولیب اوتگن اوچره شووده منطقه بوییچه بار قیین‌چیلیک‌لر اورته دن ایلتیش تعهدینی بیرگنلر.
شریعت‌مداری جمهوری ریاست ارگیده جمهور رییس بیلن اوچره شگنده، افغانستان بیلن ایران ارا بیرگه لیک یاردملیک کمیسیونی توزه تیلیشدن خبر بیردی و ایران ایچکی ایشلر وزیرینی کمیسیونده‌گی بو اولکه نماینده سی صفتیده معرفی قیلدی. بوکمیسیون یوزه گه کیلیشیدن هدف افغانستان بیلن ایران ارا یاردملیک‌لر یولینی تاپیش اوچون بولگن.
جمهور رییس هم افغانستان تامانیدن کابینه وزیرلریدن بیری بوکمیسیون عضوی حیثیده معرفی بوله‌دی دیدی.
اولکه آلدینگی جمهور رییسی حامد کرزی زمانیده ایران بیلن افغانستان رابطه سی انیق بولمه گن‌لیگی دلیل، بیرگه لیک استراتژیکی هم بیلی ایمس ایدی. ایندی کی حکومت بیلن ایران رابطه لری منطقه بوییچه بولگن استراتژیکی‌گه قره گنده قنی قنقه بوله‌دی.
