بوگون «چهارشنبه» کابل ولایتی نینگ 33 ینگی نماینده‌سی و پکتیا ولایتی‌نینگ 5 ینگی نماینده‌سی، نماینده‌لر کینگشی آچیلگنیدن 19 کون اوتگندن سونگ، جمهورلیک ریاستی سرایی‌ده آنت ایچگن‌لر.
جمهورلیک ریاستی سرایی ده اوتکزیلگن آنت ایچیش مراسمی ده نطق سوزله‌گن جمهور رئیس محمداشرف غنی، نماینده‌لر کینگشی سیلاویده اهالی اشتراکی نی حماسه بیلیب ایتیشیچه، اهالی هیچ بیر تهدید و قورقینچ برابریده بویین اینگمه‌گن و قورقمس دن آواز بیرگن‌لر، بیراق اوتگن ییل سیلاو مدیریتی هلاکت‌لی ایدی.
جمهور رئیس نینگ کوپه‌یتیریشیچه، مردم‌سالارلیک توزوملر تاریخی‌ده سیلاولر نتیجه‌سی 7 آیدن کیین اعلان ایتیلگنی تکرارسیز بولگن و سببی سیلاولر کمیسیونلری نینگ سابق رسمی‌لری بولگن.
جناب غنی، ینه بیر بار اوچ حکومتی کوچ آره‌سیده اویغونلیک بولیشی اوستیگه تأکیدلب ایتیشیچه، افغانستان ترقیاتی اوچ کوچ نینگ قوشمه ایشی گه باغلیق بوله‌دی.
جمهور رئیس غنی، نماینده‌لر کینگشی نینگ 17- دور نماینده‌لریدن سیلاو قانونی اوستیگه ایش قیلیشی‌نی سوره‌گن.
شونینگدیک، جناب غنی نماینده‌لر کینگشی‌ده غزنی ولایتی نینگ نماینده‌لری یوقلیگی‌‌نی کته بیر بوشلیک بیلیب و سیلاولر کمیسیونلریدن غزنی ولایتی نماینده‌لر کینگشی سیلاوینی جمهورلیک ریاستی سیلاوی بیلن بیرگه یولگه قوییش‌لرینی طلب قیلدی.
سیلاولر ایرکین کمیسیونی، پکتیا ولایتی نینگ سونگی نتیجه‌سینی 9- ثور نماینده‌لر کینگشی آچیلگنیدن ایکی کون اوتگنیدن سونگ و کابل ولایتی نینگ نتیجه‌سینی اوتگن کیچه نماینده‌لر کینگشی آچیلگنیدن 18 کون اوتگنیدن سونگ اعلان قیلدی.
نماینده‌لر کینگشی نینگ 17- دوری، 6- ثور ده کابل و پکتیا نماینده‌لری نینگ غیابیده جمهور رئیس غنی تامانیدن آچیلگن ایدی.
