رمضان مبارک آیی نینگ کیریب کیلیشی بیلن تورکیه دولتی نینگ انسان پرورلیک اداره‌سی یا تیکا، کابل شهریده حیات کیچیره‌دیگن کم‌بغل عایله‌لریگه افطارلیک و ییگولیک آذیقه‌سی توزیع ایتیب کیلماقده.
بوگون (یکشنبه 6 سرطان) تیکا دفتری نینگ افطارلیک نوبتی افغانستان بدن تربیه‌لش عمومی ریاستی‌ده بولیب، چمه‌سی 1000 مینگ عایله‌نی اوز افطارلیک مراسمی‌ده چقیرگن ایدی.
افطارلیک آقشام ساعت 7 ده باشلنیب شام آزانی ایتیلیشی بیلن یکونله‌دی.
بو آقشامگی افطارلیک هرکونگی‌دیک قشاق عایله‌لر، یتیم باله‌لر و بیوه عیاللرنینگ احوالینی سوره‌ش و افطارلیک بیریش نیتی‌ده، تیکا موسسه‌سی باشلیغی سلیمان شاهین، افغانستان بدن تربیه‌لش عمومی ریاستی باشلیغی همایون خیری و مملکت بوکس سپورت قهرمانی باز محمد مبارز و باشقه اونلرچه سپورتچی‌لر حضوریده بولیب اوتدی.
تیکا دفتری نینگ قشاق عایله‌لرده بوله‌جک یاردم‌لری کوزگه کورینرلی درجه‌ده بولیب، رمضان مبارک آیی نینگ کیریب کیلیشی بیلن حاضرگه قدر چمه‌سی یوزلرچه اقتصادی ضعیف عایله‌لرگه انسان پرورلیک مساعدتینی قیلگن.
تورکیه دولتی نینگ انسان پرورلیک موسسه‌سی یا تیکا، بوندن ایکی کون آلدین هم کابلده جایلشگن مرکزی دفتریده 600 گه یقین کابل بیلیم یورتلری طلبه‌لری‌نینگ افطارلیککه چقیرگن ایدی.
