د افغانستان د رڼو ټاکنو بنسټ مسوولین حکومت ته خبرداری ورکوي، که چېرې يې په ټاکنیزو کميسیونونو کې له لاسوهنو ډډه و نهکړه، نو دوی به يې هم په افشا کولو سره لاسوهنې بربنډې کړي.
د افغانستان د رڼو ټاکنو د بنسټ مشر محمد نعیم ایوبزاده د یکشنبې په ورځ په کابل کې خبري غونډې ته وویل، هغه غو ښتنه چې د دوو کلونو په اوږدو کې دوی د ټاکنو په اړه د سمونونو په برخه کې درلوده هغه ترسره نهشوه.
افغانان له حکومته غواړي، چې پهدې برخه کې په اخلاص سره کار وکړي.
ایوبزاده وایي، چې راتلونکې ټاکنې د افغانانو له پاره یو اُمید دی، خو حکومت په خپلو لاسوهنو سره د خلکو دې هيلې پر مخ هم خنډونه جوړوي.
ایوبزاده ګواښ کوي، چې تیفا د حکومت د لاسوهنو اسناد په اختیار کې لري، که دې کار ته د پای ټکی کې نه ښودل شي، نو په افشا به یې کړي.
نوموړي وویل: " زمونږ تاکید پر دې دی، چې حکومت دې اجازه ورکړي، څو ټاکنیز کمېسیونونه په خپلواکه او بېپرې توګه خپل کار مخ ته بوځي."
د تیفا رییس وایي، دوی ته داسې رپوټونه رسېدلي دي، چې دا په ډاګه کوي د ټاکنیزو کمېسیونونو د نویو غړیو د شخصیت د ترور مسئله ده او کارکونکي دې ته تحریک کوي چې ډلهییز کار ونه کړي .
خو د ټاکنو د خپلواک کمېسیون رییس نجیبالله احمدزی وایي، چې د ټاکنو د ترسره کولو په اړه یې بنسټیز کار پیل کړی دی او دی خوښ دی، چې په افغانستان کې داسې بنستونه شته چې د دوی له کړنو څارنه کوي.
احمدزي زیاته کړه، د ټاکنو کمېسیون خپلواک دی او چا ته د لاسوهنې اجازه نه ورکول کېږي.
د ټاکنو کمېسیون رییس وایي، چې د دې کمېسیون ډلهییز کار د لومړۍ طرحې په اړه چې د ټآکنېزو حوزو په اړه دی ولسمشرۍ ماڼۍ ته سپارل شوی.
احمدزی له حکومت څخه غواړي، هغه درې تنه چې یې د دې کمېسیون د دارالانشاء د ریاست د نوماندانو په توګه ورپېژندلي دي؛ یو تن دې د رییس په توګه و ټاکي.
په همدې حال کې د ټاکنیزو شکایتونو د کمېسیون رییس عبدالعزیز اریایي وایي، چې په افغانستان کې پارلماني او د ولسوالیو شورا ګانو ټاکنې د دموکراسۍ وروستی ازمیښت دی او ټینګار کوي، چې د ټاکنیزو کمېسیونونو خپلواکي ته دې درناوی وشي.
