تورکیه‌ده قانگه بیلنگن افغانستانلیک مهاجرلرنینگ فوتو صورتلری ایکّی کوندن بیری اجتماعی ترماقلرده قولمه قول بوله‌دی. تورکیه نینگ افغانستان‌ده‌گی ایلچیلیگی خبرنامه‌سیده، بو مملکت‌ده افغانستانلیک قاچقینلر اورته‌سیده یوز بیرگن آتیشمه‌ده افغانستان وطنداشی بولمیش بیر انسان اولدیریلگن.
معلوماتلرگه قره‌گنده حادثه استانبول شهری‌نینگ سلطان غازی منطقه‌سیده یوز بیرگن.
واقعه آرتیدن تورکیه حکومتی سوریه‌لیک 300 مهاجر، پاکستان فقراسی بولیمیش 200 نفر و افغانستانلیک30 نفرنی حبس‌گه آلگن. ایتیلیشیچه، بولرنینگ رسمی حجتی بولمه‌گن. حادثه توغریسیده پولیس کوپراق تیرگاوو باشله‌گن دیدی محلی منبعلر.
واقعه یوز بیرگن محل‌ده حیات کیچیره دیگن افغانستانلیک فقرا عارف فرهمند نینگ سلام وطندارگه معلوم قیلیشچه، توقنشوو دستلب افغانستانلیک بیر مهاجر بیلن کُرد وطنداشی اورته‌سیده باشلنگن. نتیجه‌ده کُرد فقراسی اولدیریلگن.
جناب فرهمنده، اوشبو حادثه‌دن کیین منطقه نینگ اونلب کُرد فقراسی سلطان غازیده حیات کیچیره‌دیگن قاچقینلرگه هجوم قیلیشگن. توقنشوونینگ نتیجه‌سیده 30 کیشی هلاک بولیب کمیده 50- 60 انسان یره‌لنتیریلگنی ایتیله‌دی.
تورکیه‌ده‌گی افغانستانلیک مذکور مهاجرگه کوره، پولیس هم حادثه آلدینی آلیش‌گه موفق بولمه‌گن.
ایتیلیشیچه، حاضر وضعیتی یخشیلشگن. بیراق افغانستانلیک مهاجرلرگه اویدن تشقری چیقیش‌گه رخصت بیریلمه‌گن هلی.
استانبول نینگ غربیده جایلشگن سلطان غازی منطقه‌سیده کوپراق سوریه، پاکستان و افغانستان قاچقینلری استقامت قیله‌دی. لیکن، بو منطقه‌ده پاکستان و سوریه‌دن کوره افغانستانلیک مهاجرلرنینگ سانی کوپ دیدی منبعلر.
