.jpg)
تیتراق آواز و ایچیده قورقوو جای آلگن اوشبو خاتین تورت آی داعش نینگ تورمهسیده بولگن لیگیدن حکایت ایتهدی. باشیده بورقه (چادری) بولیشیگه قرهمهی، اما اونینگ آوازیده بیر قسیم پریشانلیک و قوروو بارلیگی سیزیلیب تورگن.
مستعار ناملی زرمینه داعش طرفدارلری چمهسی تورت آی آلدین اونی 5 عیال، 2 گودک و 12 ایرکک بیلن ننگرهار ولایتینینگ کوت تومنیده اوغیرلهگنینی تیلگه آلهدی.
زرمینه و یولداشلری اچین تومنی نینگ مومن دره منطقهسیده داعش جنگریلری قولیده بولگن. اونینگ ایتیشیچه، تورموش اورتاغی محلی پولیس صفیده و داعش ایسه انه شو سبب اونی اوغیرلهگن.
زرمینه نینگ حبسدن آزاد ایتیلیشیگه قرهمهی، هنوز هم داعش جنگریلری نینگ تاووشی اونینگ قولاغیده جرهنگلهیدی. او داعش نینگ تورمهسیده بولگندن بویان روحی توشکونلیککه چلینگن و انده – سنده اوزیدن کیتهدی.
زرمینه حکومتدن برقرار بیر ییرگه آلیب باریلیب دوالهنیشینی سورهگن.
زرمینه نینگ اوغلی و قیزی هم داعش تورمهسیده بولگن. زرمینگه کوره، قیزی حبس جریانیده روحی کسللیک تاپگن. او، داعش نامینی ایشیتیش بیلن اختیارینی قولدن بیرهدی.
.jpg)
زرمینه بیلن تورمهده بولگن باشقه بیش عیال هم تورت آی نینگ قرانغو بیر اتاقده اوتکزگن لیکلرینی تیلگه آله دیلر.
نامی فاش ایتیلمس لیک شریطی بیلن سلاموطندارگه صحبت بیرگن مذکور عیاللردن بیری، کوندهلیک آذوقهلری فقط ایکّی ته کچالو بولگن لیگینی بیلدیرهدی.
بو خانیم نینگ داعش کیشیلریدن خاطرهسیده قالگن یگانه نرسه اولرنینگ ساچی اوزونلیگی و پاکستان فقراسی تیلیده گپیریشی دیر.
نامی سیر سقلهنیشنی ایسته گن کوت تومنی نینگ قوم بویوکلریدن بیری، مذکور خانیملر داعش نینگ ایکّی اعضاسی آزاد ایتیلیشی مقابلیده قوییب یوباریلگنلر دیگن.
مملکت شرقیده انسان حق و حقوقلری مستقل کمیسیونی نینگ باشلیغی صبرینا حمیدی، بو مساله خلق ارا انسان حق و حقوقلری نینگ قانونیگه ضد ایکن لیگینی بیلدیرهدی.
