د تخار د خواجهغار ولسوالۍ یو شمېر اوسېدونکي دغه ولایت کې د نجونو له تعلیمي وضعیته د اندېښنې په څرګندولو سره سلاموطندار ته وايي چې دغې ولسوالۍ کې د طالبانو د بریدونو زیاتېدل لامل شوي چې د پام وړ شمېر نجونې ښوونځي ته لاړې نهشي.
دوی ناامنۍ او د طالبانو له لوري د محدودیت وضع کول، د نجونو له لوري د ښوونځيو د خوشې کولو اصلي لامل بولي.
د تخار د خواجهغار ولسوالۍ اوسېدونکی عبدالرحیم وايي، دوامداره جګړې، د بېوزلۍ زیاتېدل او تاوتریخوالی لامل شوی چې نجونې ښوونځي خوشې کړي.
د خواجهغار د نجونو لېسې زدهکوونکې ستایش هم ناامنۍ له تعلیمه د نجونو د لرې کېدو اصلي لامل بولي او له دولته غواړي، دوی لپاره له تاوتریخوالي پاکه فضا کې د ښوونې او روزنې زمینه برابره کړي.
د ياد ولايت د ولایتي شورا غړی محمد اعظم افضلي سلاموطندار ته وويل، د دغه ولایت ځینو برخو کې د طالبانو د پراخه حضور له کبله نجونې نهشي کولی ښوونځي ته لاړې شي.
د تخار د پوهنې ریاست د نظارت امر سید حمیدالله سادات د دغه خبر په تایید سره وايي، طالبانو تل ښوونځیو ته د نجونو د تلو مخه نیولې او وخت نا وخت يې د نجونو د ښوونځیو دروازې تړلې دي.
د نوموړي په وینا، طالبان نجونو ته د ښځو له خوا د تدریس مخنیوی کوي.
خو د طالبانو له ویاندویانو يو يې ذبیح الله مجاهد بيا وايي، د بهرنیو ځواکونو حضور د جګړې اصلي لامل دی او د جګړې په دوام کې د نجونو له لوري د ښوونځي خوشې کول، هم طبیعي خبره ده.
تخار د افغناستان شمال ختیځ کې یو له ناامنه ولایتونو دی چې دې وروستیو کلونو کې طالبان په کې په پراخه توګه حضور لري.
