د تخار د کوکچې سيند غاړو ته د پرتو ولسوالۍ ډاکټرانو او روغتيايي کارکوونکيو تېره ورځ «د ثور ۱۶مه، سهشنبه» کاربنديز کړی او لامل يې هم د څو مياشتو راهيسې د معاش نه ورکړه يادوي.
دښتقلعه، خواجهبهاوالدین، خواجهغار، درقد، ينګيقلعه، چاهاب او رستاق هغه ولسوالۍ دي چې د تخار د کوکچې د سيند پر غاړه پرتې دي.
د ينګيقلعه ولسوالۍ د روغتيا د برخې مسوول ډاکټر نسیم شاکر سلاموطندار ته وايي، تخار ولايت ټولو روغتيايي کارکوونکيو له ۶ مياشتو راهيسې معاشونه نه دي اخيستي او له همدې کبله يې خپل فعاليت ځنډولی دی.
شاکر زياتوي، د عامې روغتيا وزارت د تړون له مخې د تخار ولايت د روغتيا برخې د ټولو کارکوونکيو معاشونه د يوه غيردولتي «اهيد» بنسټ له لوري ورکول کېږي؛ خو ياد بنسټ يې له شپږو مياشتو راهيسې معاشونه نه دي ورکړي.
د نوموړي په وينا، «اهيد» غيردولتي بنسټ عامې روغتيا وزارت سره د تخار ولايت د روغتيا رياست د درملو د لېږد او مالي حساب تړون کړی دی.
د کوکچې سيند غاړو ته د پرتو ولسواليو ډاکټران وايي، د حکومت مرکزي ادارې په دې ولايت کې د ياد شمېر ولسواليو روغتيايي مرکزونو کې له کورونا ويروس د مبارزې په برخه کې هم هېڅ ډول مرسته نه ده کړې.
د يادو ولسواليو يو شمېر اوسېدونکي هم وايي چې ډاکټران يې د معاش د نه ورکړې له کبله د دوی د ناروغانو درملنه نه کوي.
له ډېرو هڅو سره سره ونه توانېدو چې راپور کې د اهيد غيردولتي بنسټ مسوولانو نظر هم ولرو.
خو د تخار د عامې روغتيا رياست رييس نصرالله قاضيزاده وايي چې دا موضوع د عامې روغتيا وزارت له رهبرۍ سره شريکه کړې او د وزارت مسوولانو ورسره ژمنه کړې چې ژر به يې ياده ستونزه حل کړي.
