تخار ولایتیده مرکزی بانک نماینده‌لیک دروازه‌سی اونگیده تعرفه پولی‌نی توللش اوچون صف تارتگن پاسپورت مراجعتچی‌لری‌نینگ ایتیشیچه، نیچه کوندن بویان نوبت‌گه تورگن‌لر، بیراق پولیس ایریم کیشی‌لردن پول آلیب نوبت‌سیز کیریش‌گه رخصت بیره‌دی.
اولرنینگ ایتیشیچه، پولیس هر بیر کیشی‌دن 100-300 افغانی پول آله‌دی و اولرگه نوبت‌سیز کیریش‌گه رخصت بیره‌دی. اولردن بیرقطاری‌نینگ ادعا قیلیشیچه، تورت کوندن بویان حاضرگچه پاسپورت پولی‌نی توللش‌گه مؤفق بولمه‌گن؛ چونکه بانک دروازه‌سی ایرته‌لب ساعت 11 دن سونگ یاپیله‌دی.
مراجعتچی‌لردن بیری تامانیدن آلینگن صورت، بیر پولیس عسکر پاره آله‌یاتگنینی کورسته‌دی. اونینگ ادعا قیلیشیچه، اوشبو صورت‌نی مرکزی بانک پولیسی مراجعتچی‌لرنینگ بیریدن 300 افغانی پاره آله‌دیگن چاغیده چیککن؛ بیراق صورتی آلینگن عسکر، بو موضوع‌نی رد قیله‌دی.
عین حالده، تخار ولایتی مرکزی بانک نماینده‌لیک اورین باسری فریدون هاشمی، اوشبو بانک پولیسی پاره آلیشی توغریسیده بولگن ادعالرنی رد قیلیب ایتیشیچه، مذکور پولیس دوست‌لریدن بیری‌نینگ تعرفه پولی‌نی آلیب بانک‌که تاپشیرگن. بیراق او، بانک‌ده بیران کیشی‌نی تانیدیگن کیشی‌لرنینگ ایشی تیزلیک‌ده بولیشی‌نی قبول قیله‌دی.
مرکزی بانک نماینده‌لیک مسؤوللری‌نینگ ایتیشیچه، ایران ویزه‌سی قیمتی کمه‌یگنی و حج سفری باشلنگنی باعث، پاسپورت مراجعتچی‌لری کوپه‌یگن. شو یوزه‌دن کونده یوزلرچه کیشی پول تاپشیریش اوچون بانک‌که مراجعت قیله‌دی و بو موضوع بانک نظم سیزلیگی‌گه سبب بولگن.
