دوشنبه کون مرکزی آسیا مملکتلریدن بیرقطاریگه سفر قیلگن روسیه جمهور رییسی ولادیمیر پوتین، احتیاج سیزلیگن حالده، افغانستان چیگرهسیده امنیتی تهدیدلرگه قرشی کورهش مقصدیده تاجیکستاندهگی حربی قرارگاهدن فایدهلهنیش ممکن دیگن.
بیراق، سیاسی ایش بیلرمانلرنینگ ایتیشیچه، افغانستان خصوصیده روسیه خواطری کون سایین آشماقده. بو قبیل خواطرلر افغانستان حکومتی تامانیدن جدی آلینیشی کیرهک دیگن تحلیلچیلر.
سلام وطندار بیلن صحبت اوتکزگن سیاسی ایش بیلرمان داکتر بصیر رنجبر، افغانستان اوتمیشدن حاضرگه قدر روسیه نینگ اوزاق مدتلی دقت مرکزیده بولگن شونینگ اوچون بو مملکت افغانستاننی یالغیز قویمهیدی دیدی.
جناب رنجبرگه کوره، اورته آسیاده عصیانچی گروهلر فعالیتی آشگنی و سابقدن روسیهگه رقیب بولیب کیلگن مملکتلر افغانستانده جایلشگنی یوزهسیدن رسمی مسکو بو وضعیتدن خواطرلنهدی.
سیاسی ایش بیلرمانلردن باشقه بیری یونس فکور، روسیهگه رقیب دولتلر افغانستانده حربی فعالیت آلیب باریشی و شونینگدیک اوشبو مملکتده عصیانچی گروهلر سانی آشیب باریشی روسیه دولتینی بعضی بیر خواطرلرگه سالنگن لیگیگه اشاره قیلگن.
بوندن آلدین هم روسیه دولتی، افغانستان توغریسیده تورلی بیانات بیرگن ایدی. رسمی مسکو بیر مرته طالبلرگه همکارلیک کورستدی و اونینگ یانیده تینچلیک لایحهسی افغانستانده نتیجه بیریشی اوچون بعضی بیر یاردملرنی قیلیشگه هم تیار ایکنلیگینی معلوم قیلگندی. شونینگدیک، ترقهتیلگن بعضی بیر گزارشلرگه کوره، اوشبو مملکت قندوز ده طالبلر اوچون حربی تعلیمات بیریش مرکزلر تاسیس قیلگن.
افغانستانده تینچلیک اورنهتیلیشی اوچون رسمی مسکو رسمی کابل اشتراکی سیز اوچ تامانمله ییغین اوتکزگن ایدی. رسمی مسکو نینگ بو ایشی افغانستان رسمیلری آرقهلی جدی عکسالعمللرگه روپه ره بولگن ایدی.
