بامیان بودا شمالی‌نینگ بیر کیلو مترلیگی‌ده تاغ غارلریدن بیریده «مکتب‌دن ایلگری تعلیمات» نامی‌ده بیر کودکستان فعالیت قیله‌دی و اونده 25 طلبه موجود و اوقیتووچیسی ایسه 12- صنف اوقووچیسی بولگن بیر قیز دیر.
19 یاشر فرشته احمدی‌نینگ سلام‌وطندارگه ایتیشیچه، بو کودکستان‌نینگ قوریلگنیدن 6 ییل بولگن. او، حاضر بو کودکستانده 18 قیز و 7 اوغیل باله‌گه دری، انگلیسی، ریاضی و قرآنکریم مضمونلرینی تعلیمات بیره‌دی. کودکستان جایلشگن غار فرشته یشه‌یدیگن اوی دیر.
فرشته احمدی، بو غارده ایچیملی سوو یوقلیگی‌دن شکایت قیله‌دی و محلی حکومت‌دن بو توغریده یاردم بیریشی‌نی سوره‌یدی.
محل یشاوچیلری و بو کودکستان باله‌لری‌نینگ عایله‌لری امکانیت بولمه‌گنده هم بونده‌ی بیر کودکستان قوریلگنیدن خرسندلیک بیلدیریب و اوز نوبه‌لریده حکومت و رسمی‌لردن اوشبو تعلیمات مکانی‌گه کوپراق دقت قیلیش‌لرینی طلب قیله‌دیلر.
مکتب‌دن ایلگری تعلیمات ناملی کودکستانده بیر کتابخانه هم توزه‌لگن و بو کتابخانه‌ده حاضر باله‌لر، اسلامی تعلیمات و انگلیسی توغریسیده بولگن 300 جلد کتاب موجود. بو کتابخانه‌نینگ کتاب‌لریدن کوپینچه‌سی فرشته احمدی‌نینگ اوزیگه تیگیشلی بوله‌دی و بولرنی اوز شخصی پولی‌دن ساتیب آلگن.
