بدخشان ولایتینینگ چیگرهلرده قرار تاپگن تومنلرینینگ یشاوچیلری قتناو یول بولمهگنی باعث تاجیکستان یولی آرقهلی باشقه منطقهلردن اوتیب قیتهدی.
مذکور تومنلر یشاوچیلریدن بیرقطارینینگ ایتیشیچه، تاجیکستان مملکتنینگ بیر آیلیک ویزهسینینگ بهاسی یوقاری بولگنی باعث اهالی جدی قیینچیلیک بیلن دوچ کیلگن.
اولرنینگ ایتیشیچه، مذکور قیینچیلیکلر سبب اهالی کسللرینی بدخشان مرکزی و یا-ده تاجیکستان ساغلیق مرکزیلریگه انتقال بیرهآلمهیدی و کوپ قطار واقعهلرده اوشبو کسللر جان بیرهدی.
بدخشان یشاوچیلریدن ایکی تهسی اجمل درویش و سرور احمدینینگ ایتیشیچه، بوندن آلدین تاجیکستاننینگ بیر آیلیک ویزهسی 60 یا-ده 70 دالر ایدی؛ بیراق خاضرده 400 دالر دیر و اهالیگه اوشبو پولنی تولهش کوچ یوق دیر.
بدخشان حاکمی احمدفیصل بیکزادنینگ ایتیشیچه، بدخشانده تاجیکستاننینگ قونسلگرلیگینینگ قوریلیشی اهالیگه قولیلیک کیلتیرگن و باشقه قیینچیلیکلرنی هم حل قیلیش اوچون سعی و حرکت قیلهدیلر.
بدخشان حاکمینینگ ایتیشیچه، ویزه پولینینگ یوقاری بولگنی اهالیگه قرشی قیینچیلیک یرهتگن و مذکور قیینچلیکلرنی حل قیلیش اوچون سعی و حرکتلرنینگ دوامی بار.
بو توغریده تاجیکستان قونسلگرلیگی رسمیلرینینگ فکرینی آلیش اوچون سعی و حرکت قیلدیک بیراق قونسلگرلیک رسمیلری بیلن صحبت قیلیشگه موفق بولمهدیک.
