تأثیر ناامنی‌ها بر همکاری‌های مرزی تاجیکستان و بدخشان

اعضای شورای ولایتی و باشندگان مناطق مرزی بدخشان می‌گویند، در پی ایجاد محدودیت‌ها و عدم تطبیق تفاهم‌نامۀ مشترک مرزی میان بدخشان-افغانستان و بدخشان-تاجیکستان، باشندگان ولسوالی‌های مرزی بدخشان که نیازمندی‌های‌شان را از طریق تاجیکستان برطرف می‌کردند با مشکلات زیادی روبه‌رو شده‌اند.

طلب‌الدین قادری، عضو شورای ولایتی بدخشان به سلام‌وطندار می‌گوید، اکنون محدودیت‌های مرزی تا اندازه‌یی‌ست که  شماری از بیماران به دلیل انتظار طولانی و اجازه نیافتن برای عبور از مرز توسط مرزبانان تاجیک جان‌های‌شان را از دست می‌دهند.

حبیب‌الله، یکی از باشندگان ولسوالی‌های مرزی بدخشان می‌گوید، محدودیت‌های مرزی در تمام سطوح به ویژه در زمینۀ انتقال بیماران زن جهت تداوی به کشور تاجیکستان آنان را با مشکلات جدی روبه‌رو کرده است.

با این حال نیک‌محمد نظری، سخنگوی والی بدخشان می‌گوید، همکاری‌های مرزی تاجیکستان به استثنای اندک مواردی که در پی نگرانی‌های امنیتی برای چند روز محدود منجر به بسته‌شدن مرزها می‌گردد، به گونۀ عادی ادامه دارد.

به گفتۀ نظری، حکومت محلی بدخشان برای برطرف‌کردن نگرانی‌های امنیتی کشور تاجیکستان و مشکلات باشندگان مناطق مرزی با کشور تاجیکستان گفت‌وگو کرده است و به زودی این مشکل برطرف می‌شود.

باشند‌گان ولسوالی‌های مرزی بدخشان می‌گویند، ایجاد محدودیت‌های مرزی  در پی نگرانی‌های امنیتی تاجیکستان دسترسی آنان به مواد اولیۀ مورد نیاز و خدمات بهداشتی را به مشکل روبه‌رو می‌کند.

مقام‌های محلی بدخشان می‌گویند، اگر تلاش‌های آنان برای حل مشکلات مرزی به نتیجه نرسد، آماده‌گی لازم را برای کمک‌رسانی به باشند‌گان ولسوالی‌های مرزی روی دست دارند.