بلخ ولایتی بوییچه مدنیت و معلومات ریاست مسؤوللری، اوشبو ولایتده یاش شاعرلرنینگ فعالیتی کوپه‌یگنیدن خبر بیریب ایتیشیچه، جاری ییل قویاش ییل‌ده اوشبو ولایت بوییچه یازووچیلر انجمنی تامانیدن بلخ شاعرلری نینگ 15 دن آرتیق شعری مجموعه‌سی چاپ ایتیلگن.
سونگی ییل‌لرده مملکت بویلب اینیقسه بلخ ولایتی نینگ یاشلری آره‌سیده شعر و ادبیات دییرلی شکلده رواجلنیب و کوپینچه یاشلرنی اوزی گه جلب قیلگن. یاش شاعرلردن کوپینچه‌سی فعالیت‌لرینی ادبی انجمن‌لرگه بورچلی بیلیشه‌دی.
عین دمده، بلخ ولایتی بوییچه مدنیت و معلومات ریاست باشلیغی صالح محمد خلیق، سلام‌وطندارگه بیرگن صحبتیده، سونگی ییل‌لرده یاشلر شعر و ادبیات گه یوز کیلتیرگن‌لری یوتوقلی بیلیب ایتیشیچه، جاری قویاش ییل جریانیده مذکور ولایت بوییچه شاعرلر و یازووچیلر انجمنی 15 دن آرتیق شعری مجموعه چاپ قیلگن.
اونگه کوره، یاشلردن کوپینچه‌سی شعرلرینی شخصی شکلده چاپ قیلیشه‌دی و شو یوزه‌دن چاپ ایتیلگن شعری مجموعه‌لردن دقیق رقم بو اداره ده رویخط‌گه آلینمه‌گن.
سونگی ییل‌لر جریانیده مزارشریف شهریده نیچه ادبی انجمن ایش گه باشله‌گن و هر بیری نینگ اونلرچه اعضاسی بار.
مزارشریف شهریده پرتو مدنی انجمنی، زلف‌یار مدنی حلقه‌سی، پرواز ادبی انجمنی، بلخ ادبی انجمنی، شاعرلر انجمنی، یازووچیلر انجمنی و شولرگه اوخشه‌گن باشقه ادبی انجمن‌لر فعالیت قیلیشه‌دی.
بلخ محلی مسؤوللری نینگ ایتیشیچه، بو ولایتده ادبی انجمن‌لرنینگ فعالیتی یاشلر آره‌سیده ینگی بیر فکری حرکت وجودگه کیلگنینی کورسته‌دی.
بیلیم یورت استادی صادق عصیان، یاش شاعرلرنینگ فعالیتی کینگه‌یگنی و اولرنینگ اثرلر چاپ ایتیلگنیدن خرسندلیک بیلدیریب ایتیشیچه، یاشلر فرقلی اثرلر ایشلب چیقاریش گه بی‌فرق یانده‌شمه‌گونگه‌قدر، اوز مجموعه‌لرینی چاپ ایتیب و نشر قیلیش گه هم بی‌فرق یانده‌شمه‌گن‌لر.
بلخ ولایتی بوییچه مدنیت و معلومات ریاستی نینگ مسؤوللری گه کوره، یاش شاعرلرنینگ فعالیتی اوتمیش‌ده بولگن شاعرلردن فرقلی دیر.
اولرگه کوره، حاضرگی شاعرلر کوپلب کیشی‌لیک تویغولری، قیین‌چیلیک‌لر و سیاسی موضوعلرنی شعر قالبی‌ده کیریتیشه‌دی.
