بلخ ولایتی یشاوچیلریدن یوزلرچهسی ناراضلیک بیر نمایش یولگه قوییش بیلن، بو ولایتده برق قیمتی قویی کیلیشی نی سورهشگن. مذکور اعتراضچیلر «بیزلر فرقسیز برق ایستهیمیز» شعاری بیلن بو ولایت نینگ برق ریاستی ایشیگی نی باغلهگن. اولر باشقه نیچه کون گچه بیر کیلووات برق ۶.۲۵ افغانی دن ۲.۵ افغانی گه قویی کیلمهگن صورتده، کابل نینگ برقی نی کیسیب و برق بیلی نی تولمهسلیکلری خصوصیده حکومت نی آگاهلنتیرگن.
اعتراضچیلر برق خرهجتی زوروانلر آرقهلی تولنمهگنی حقیده، حکومت نینگ جیملیککه عیبلب ایتیشلریچه، ایستهکلریگه ایجابی جواب بیریلمهگن صورتده، اعتراضلریگه دوام بیرهدیلر.
دولت ایشلاوچیلریدن بیری میرویس نینگ ایتیشیچه، ۶ مینگ افغانی معاشی بار، بیراق اوچ مینگی نی برق خرهجتی اوچون تولهیدی. او، بو وضعیت دوام تاپیشی دن خسته بولگن.
بلخ مدنی فعاللریدن ایکی تهسی باور بامیک و نوریه نجفیزاده نینگ ایتیشلریچه، برق قیمتی قویی کیلیشی اوچون برشنا شرکتی گه بیر هفته وقت بیرگنلر. اولر آگاهلنتیریب ایتیشلریچه، بیر هفته گچه بو ایستهکلریگه توجه بولمهگن صورتده، برشنا شرکتی گه قرشی کینگ ناراضلیک نمایش یولگه قوییب و تحصن خیمهسی قوریشلری ممکن.
بیراق بلخ ولایتی برق ریاستی باشلیغی حمیدالله حمید نینگ ایتیشیچه، بو ولایتده برق قیمتی قویی کیلیش ریجهسی جمهوررئیس آرقهلی تصدیقلنگن و یقیین کونلرده بو ولایتده برق قیمتی قویی کیلیشی ممکن.
بلخ ولایتیده یشش اویلر اوچون بیر کیلووات برق قیمتی ۶.۲۵ افغانی، صنعتی فابریکهلر اوچون ۶.۷۵ افغانی و شرکتلر، دفترلر و دکانلر اوچون ۱۶.۷۵ افغانی دیر.
بو بیرینچی مرته ایمس کیم بلخ یشاوچیلری برق قیمتی یوقاری بولگنیدن شکایت قیلیشهدی. شونینگدیک اولر اوتمیشلرگه هم برق قیمتی یوقاری بولگنی خصوصیده اعتراض قیلگن ایدی، بیراق حاضرگچه بو قیینچیلیکلری حل بولمهگن.
