بلخ ولایت مرکزی و تومن‌لریده بیرینچی مرته کووید 19 ویروسی گه شبهه‌لی کسل‌لرینی تاپیش و معلومات مرکزی آچیلدی.
اوتگن کون (شنبه 20- ثور) بلخ ساغلیک ریاستی باشلیغی نظام‌الدین جلیل نینگ ایتیشیچه، بو مرکز کرونا ویروسی نینگ آلدینی آلیش و اوشبو ویروس گه شبهه‌لی کیشی‌لرنی تاپیش اوچون مذکور ولایت شهر مرکزی و تومن‌لریده اهالی بیلن همکارلیک قیله‌دی.
بلخ ساغلیک ریاستی گه کوره، شونینگدیک مذکور مرکز کرونا ویروسی کینگه‌یشی و کسل‌دارلرنینگ بو ویروس گه چلینیشی نی آلدی آلینیشی اوچون داکترلر و کسل‌لرگه تعلیماتی برنامه‌لر ارایه قیله‌دی.
بلخ حاکمی نینگ اورین‌باسری بشیراحمد توحیدی، اوشبو مرکز آچیلیشی نی کرونا ویروسی نینگ آلدینی آلیش اوچون اونملی دیب ایتیشیچه، بو ویروس کینگه‌یشی آلدی آلینیشی نینگ یالغیز یولی شهرلر و بازارلرگه اهالی نینگ توپلنمه‌سلیگی دیر.
بلخ‌ده حاضرگچه 324 کیشی بو کسل‌لیککه چلینیب و اولردن 16 ته‌سی جان بیرگن بیر حالده، کرونا کسل‌لری نینگ تاپیش و معلومات مرکزی آچیلگن.
بوندن آلدین افغانستان مخابرات وزیرلیگی کرونا ویروسی گه چلینگن کسل‌لرنینگ جایی نی بیللی قیله‌دیگن اپلیکیشن توزه‌تیلگنیدن خبر بیردی. مخابرات وزیری نینگ ایتیشیچه، بو اپلیکیشن کرونا گه چلینگنلر سانی و شهرنینگ تورلی موقعیت‌لریده کرونا میزانی نی کورسه‌تیشی ممکن.
مملکتده کرونا ویروسی نینگ بیرینچی ایجابی واقعه‌سی رویخط گه آلینگندن بویان، مذکور ویروس گه چلینگنلر سانی 4000 کیشی‌دن آشگن و شونینگدیک 115 کیشی بو ویروس باعث جان بیرگن.
