بغلانده مدنی فعال‌لردن بیرقطاری‌نینگ ایتیشیچه، گلبدین حکمتیار رهبرلیگی‌ده اسلامی حزب قومندانلریدن بیری آیی‌ده یوز مینگ‌لرچه افغانی باج آله‌دی و بو پول بدلی‌ده کرکر و دودکش کانلریده ایشلش‌گه رخصت بیره‌دی. اولرنینگ ایشانچی گه کوره، خوفسیزلیک تأمین ایتیلیشی‌ده محلی حکومت کوچسیزلیگی باعث، اوشبو قومندان بغلان کانلریدن باج آله‌دی.
سلام‌وطندارگه صحبت بیرگن مدنی فعال‌لردن بیری شیرمحمد مرادی‌نینگ ایتیشیچه، اسلامی حزب‌نینگ اوشبو قومندانی هر آی بغلان ولایتی‌نینگ کرکر تاش کومیر کانی‌نینگ امنیتی‌نی تأمین ایتیش بهانه‌سی بیلن 500 مینگ افغانی آله‌دی. اونگه کوره، افغان‌کول شرکتی هم مذکور کان‌نینگ قوروقچی‌لرینی ایش‌دن آلیب و اولرنینگ حقوقلرینی بو قومندان گه بیره‌دی.
شونینگ‌دیک، بغلان مدنی اداره‌لر جمغرمه اعضاسی عبدالفتاح عطایی‌نینگ ایتیشیچه، اسلامی حزب تینچلیک لایحه‌سیگه قوشیلیشی‌دن آلدین، اسلامی حزب‌نینگ اوشبو قومندانی، مذکور کان‌نینگ برچه قیمت بها اسکونه و اسباب‌لرینی تالان قیلگن ایدی.
اوشبو مدنی فعال‌نینگ کوپه‌یتیریشچه، اولر بو موضوع نی ولایت حاکمی بیلن شریک قیلگن، بیراق حاضرگچه هیچ بیر ایش قیلینمه‌گن.
شونینگ‌دیک، بغلان ولایت کینگشی، کان‌ده اسلامی حزب قومندانی‌نینگ قوراللی‌لری بارلیگی‌نی تصدیق‌لیدی، بیراق ایتیشیچه، کان ایشی‌ده اولر اره‌لشمه‌یدی.
بغلان ولایت کینگشی باشلیغی صفدر محسنی‌نینگ ایتیشیچه، گلبدین حکمتیار تینچلیک لایحه‌سیگه قوشیلیشی‌دن آلدین، اسلامی حزب‌نینگ اوشبو قومندانی کرکر کانی‌نینگ برچه اسکونه و اسباب‌لرینی تالان قیلگن.
بغلان ولایتیده افغان‌کول شرکتی مسؤوللری و اوشبو کان ایشلاوچی‌لری، بو توغریده هیچ نرسه دیمه‌یدی، بیراق ولایت حاکمی عبدالحی نعمتی‌نینگ ایتیشیچه، حاضرگچه اسلامی حزب‌نینگ اوشبو قومندانی باج آلیشی توغریسیده هیچ بیر شکایت اولرگه ییتیشمه‌گن.
عین حالده، بغلان ولایتیده کانلرنینگ قیمت بها اسکونه و اسباب‌لرینی تالان قیلیش و باج آلیش عیب‌لنگن اسلامی حزب قومندانی میرویس جهادیار، اوشبو ادعالرنی رد قیلیب ایتیشیچه، مذکور کان جهازلرینی افغان‌کول شرکتی تالان قیلگن.
اونینگ ایتیشیچه: «بیزلر کانلر ایشی‌گه اره‌لشمه‌یمیز و حکومت عملیات اوتکزگنیدن سونگ، کان‌نینگ برچه جهازلرینی افغان‌کول شرکتی و دولت آلیب کیتگن. بیزلر اوشه زمانده تاغ ده ایدیک و او ییرده کان جهازلری بیزلرنینگ دردیمیزگه تیگمس‌دی.»
بیر ییل آلدین، بغلان ولایتیده کرکر و دودکش تاش کومیر کانلری‌‌نینگ ایشی بیر مدت توخته‌تیلدی و بو کانلرنینگ تقدیری نامعلوم ایدی، بیراق بیر ییل‌دن سونگ، بو کانلر قیته‌دن فعالیت‌گه باشله‌دیلر.
