دیوارگه سویهنیب، باشینی قویی تشلهب و قولیدهگی آغاچ بیلن ییرگه خط چیزیب ایتیشیچه، بیر تاماندن عایلهسینینگ 12 اعضاسینی قولدن بیرگن غمی و باشقه بیر تاماندن اولرنینگ قرضلرینی توللش غمی اونی چوکتیرگن.
ایناغهسی و عایلهسینینگ باشقه 11 اعضاسی ترکیه سوولریدن یونانگه اوتیب و سوولرنی او تامانیدن تینچ حیات کیچیریشگه قصد قیلگن ایکن، بیراق کیمه توقنهشیشی نتیجهسیده، سووگه قربان بولگنلر.
عبدالله، جاری هفته شنبهکونی شوندهی بیرحالتده عایلهسینینگ 7 اعضاسینی کابلده توپراققه تاپشیردی کیم، حاضرگچه ایناغهسی و عایلهسینینگ باشقه تورت اعضاسی درکسیز یوقالگن. عبدالله، اولرنینگ قیتیشیگه امید بیلدیرمهیدی، بیراق اولرنینگ جانسیز تنهلری تاپیلیشینی تینیم سیز کوتهدی.
عبداللهنینگ سلاموطندارگه ایتیشیچه، ایناغهسینینگ کابل شهریده ییگولیک ماده ساتهدیگن دُکانی بار ایکن؛ دُکاننی ساتیب و کیتیشیدن آلدین، باشقه کیشیلردن نیچه مینگ دالر قرض آلگن. بونگه قوشیمچه، عایله اعضاسینینگ هر بیرینی جانسیز تنهسینی ترکیهدن کابلگه انتقال بیریشی اوچون 350 یورو توللهگن و اوزینینگ ایتیشیچه، بو پوللرنی هم قرض آلگن و او، نیچه کوندن کیین قرض بیرگنلر قرضلرینی سورهشی توغریسیده اویلهیدی.
عبداللهنینگ ایتیشیچه، قولدن بیرگن قرینداشلری اوچون خیرات قیلماقچی؛ بیراق چونتهگی بوشلیگی باعث، بو ایشگه هم قادر بولمهیدی.
اوشبو ماتمگه یالغیز عبدالله دوچ کیلمهگن؛ شونینگدیک تاغهسی، خالهسینینگ اوغلی و ابهسینینگ نیبرهسی سووگه چوکگن کیشیلرگه شامل و اولرنینگ عایلهلری هم اوشبو غمگه شریک بولگنلر.
یکشنبه کون، عبداللهنینگ عایله اعضاسینی فاتحه مراسمیده اشتراک ایتگن عبداللهنینگ قرینداشلریدن بیری شبیرنینگ ایتیشیچه، اوشبو 12 کیشی ناتینچلیک و ایش سیزلیکلر باعث، سووگه چوکگن و بوندهی کته ماتم مملکت باشقه یشاوچیلرینینگ ییتهگینی توتمسلیگی خصوصیده، دولتدن چاره تدبیر کوریشینی سورهدی.
اوشبو عایله اعضالریدن باشقه بیری محمدیوسفنینگ ایتیشیچه، مذکور کیشیلرنینگ اولیمیدن خبر بولگنیدن کیین، اولرنینگ جانسیز تنهلرینی تاپیش خصوصیده یاردم سورهش اوچون، نیچه مرته کابلده ترکیه ایلچیخانهسیگه مراجعت قیلگن؛ بیراق مذکور ایلچی خانهنینگ ناقولی حرکتیگه روپهره بولگن.
یوسفنینگ ایتیشیچه، کوپینچه سعی و حرکتلر بیلن هر بیر جانسیز تنه اوچون، ترکیه ایلچیخانهسیگه اوچ مینگ دالر بیرگن، نتیجهده 7 جانسیز تنه 15 کوندن کیین، کیندیگیدن تاماغیگچه ییرتیق حالتده تاپیلگن.
بو بیرینچی مرته کیم، افغانستان عایلهلریدن بیرینینگ 12 اعضاسی، اروپا یولیده دینگیز سوویگه قُربان بولهدی.
