بغلان ولایتیده آواز بیرووچیلرنینگ رویخط‌گه آلیش جریانی باشلنگنیدن کمیده 5 کون اوتماقده، بیراق حاضرگچه مذکور ولایت‌نینگ 5 تومنیده آواز بیرووچیلرنینگ رویخط‌گه آلیش مرکز آچیلمه‌گن.
دهنۀ غوری تومنی طالب‌لرنینگ نظارتی‌ده دیر، تاله‌وبرفک تومنی ینگی‌لیک‌ده دولت نظارتی‌گه اوتدی، بیراق خوست، فرنگ و گذرگاه نور تومن‌لری سوو تاشقین‌لری و قتناو یوللر باغلنگنی باعث، یاپیلگن و نتیجه‌ده مذکور 5 تومن حاضرگچه آواز بیرووچیلرنینگ رویخط‌گه آلیش جریان باشله‌نیشی‌گه گواه بولمه‌گن.
مذکور تومن‌لرنینگ یشاوچیلریدن بیرقطاری، آواز بیرووچیلرنینگ رویخط‌گه آلیش مرکزلر آچیلمه‌گنیدن تنقید قیلیب ایتیشیچه، کمیسیون دستلب رویخط‌گه آلیش اوچون نیاز بوله‌دیگن ماده‌لر هر یولدن بولسه رویخط‌گه آلیش مرکزلرگه ییتکزیشی کیره‌ک.
خوست تومنی یشاوچیلریدن شیرآغا و محمد اکبرنینگ ایتیشیچه، مذکور تومن‌ده چمه‌سی 90 مینگ آواز بیرووچی یشه‌یدی و اولرنینگ تقدیری گه دقت قیلینمه‌گن صورتده، اهالی حکومت گه بولگن امیدلرینی بوتونله‌ی قولدن بیره‌دی.
شونینگدیک، بغلان مدنی فعاللری‌نینگ اجتماعی اداره‌سی باشلیغی محمدعثمان شیرزی‌نینگ آگاه‌لنتیریشیچه، اهالی تقدیری بیلن اوینه‌ش حکومت اوچون خطرلی اویین بولیشی ممکن.
عین حالده، بغلان ولایتیده سیلاولر ایرکین کمیسیونی‌نینگ ولایتی دفتری مسؤوللری، مذکور ولایت‌نینگ یالغیز 9 تومنیده آواز بیرووچیلرنینگ رویخط‌گه آلیش مرکز فعال بولگنینی تَن آله‌دی. بیراق بغلان ولایتیده سیلاولر ایرکین کمیسیونی‌نینگ ولایتی دفتری باشلیغی ملک حنفی‌نینگ ایتیشیچه، قالگن تومن‌لرده آواز بیرووچیلرنینگ رویخط‌گه آلیش مرکزلر آچیلیشی توغریسیده جدی شکلده سعی و حرکت دوام ایتماقده.
جناب حنفی، مذکور ولایتده رویخط‌گه آلینه‌دیگن‌لرنینگ دقیقی رقمی توغریسیده هیچ نرسه دیمه‌یدی، بیراق حاضرگچه رویخط‌گه آلینگن‌لرنینگ رقمی‌نی 7000 کیشی دییدی.
