مملکت ترانسپورت و هوا یوللر وزیرلیگی‌نینگ مسووللری، بغلان ولایتی‌نینگ قونالغه‌سی قوریلیشی‌دن خبر بیرگن‌لر. اوشبو قونالغه پلخمری شهری‌نینگ خواجه الوان تیگیس‌لیگی‌ده 200 میلیون اقش دالری صرفله‌نیش بیلن قوریله‌دی.
شمالی 9 ولایت‌نی مرکزی آسیا بیلن باغلاوچی مذکور قونالغه‌نینگ مالی خرجتی دنیا بانکی تامانیدن توله نیله‌دی.
افغانستان ترانسپورت و هوا یوللر وزیری محمدالله بتاش، مذکور قونالغه قوریلیش‌دن تشقری تجارت رواجله‌نیشی باردی –کیلدی معماسی حل ایتیلیشی اوچون 8 ترمینال هم قوریله‌دی دیگن.
شونینگ‌دیک بغلان ولایتی‌نینگ والیسی عبدالستار بارز، بغلان‌لیک‌لرنینگ حکومت‌دن اساسی ایستکلری زمانوی قونالغه قوریش ایکن لیگینی ایتگن. عین حالده، جناب بارز، بغلان‌لیکلر بو ایستکلری عملی بولیش اوچون قوریله‌جک قونالغه امنیتی‌نی تامین قیلیش اوچون تیار ایکن لیگی باره‌سیده تاکیدله‌گن. بغلان‌ده بو کته لایحه باشله‌نیشی بیلن یوزلب کیشی ایش جایی بیلن تامین‌لنه‌دی.
پلخمری قونالغه‌سی بغلان مرکزی خواجه الوان تیگیس‌لیک منطقه‌سی‌ده قوریلیش لایحه‌سی داوودخان زمانیده ایشلب چیقاریلگن، بونینگ دستلبکی ایش‌لری داکتر نجیب الله زمانیده اوز پایانی‌گه ییتگن؛ اما، مملکت‌ده‌گی نابرقرارلیک‌لر اوشبو قونالغه قوریلیشی‌نی آرتده قالدیرگن.
