په افغانستان کې بېړنیو پېښو ته د رسېدنې په چارو کې د دولت وزیر ویس احمد برمک وايي، چې تیرکال له دغې ادارې سره ۱۴ میلیونه پونډه مرسته شوې، چې د ځینو سیندونو دغاړو په جوړولو به یې ولګوي او پهدې برخه کې یې عملاً چارې پیل کړې دي.
په افغانستان کې بېړنیو پېښو ته د رسېدنې په چارو کې د دولت وزیر دا هم وویل، چې دوی په پام کې لري، څو په نږدې راتلونکې کې د بېړنيو پېښو د مخنیوي په موخه هر اړخیز پلان ولسي جرګې ته ور واستوي.
ویس احمد برمک نن شنبه (اپریل ۸مه) د ولسي جرګې عمومي غونډې ته استجواب شوی و.
هغه وکیلانو ته په دغه استجوابیه غونډه کې د پورته مطلب د څرګندولو ترڅنګ دا هم وویل، چې تېر کال يې په هېواد کې بېړنیو پېښو ټولو زیانمنو کسانو ته د دولت د امکاناتو په چوکاټ کې رسېدنه کړې ده.
همدارنګه برمک وویل، نړیوالو او افغان حکومت ته یې قناعت ورکړی دی چې د تیرو کلونو خلاف د پېښو پرمهال د مرستو ترڅنګ باید د پېښو دمخنیوي او یا هم حداقل کموالي په برخه کې کار وشي.
هغه زیاته کړه، حکومت ته یې وړاندیز کړی، چې د دې ادارې تشکیلات زیات شي.
برمک وویل، چې اوسمهال د یوې نړیوالې موسسې په مرسته کولای شي، په څو ولایتونو کې د سیلابونو او واورې ښویدنې د پېښو له رامینځته کیدو پنځه ورځې مخکې معلومات ترلاسه کړي او چمتووالی ورته ونیسي.
په همدې حال کې د ولسي جرګې رییس عبدالرووف ابراهیمي وویل، چې دا اداره باید ارتقا وکړي او ددولت په اساسي تشکیلاتو کې راوستل شي.
ابراهیمي وویل بېړنیو پېښو ته د رسیدنې په قانون کې هم باید ډېر ژر اړین تعدیلات رامنځته شي او د پېښو د مخنیوي، او زیانمنو کسانو ته درسیدنې په موخه یوه ځواب ویونکي پالیسي جوړه او ولسي جرګې وړاندې شي.
څو ورځې وړاندې د طبیعي پېښو د یو نړیوال سازمان د موندنو پر بنسټ ویل شوي و، چې افغانستان د نړۍ د هغو هیوادونو په ډله کې دی، چې د طبعيي پېښو په لومړي قطار کې ځای لري او تر ډیره په دغه هیواد کې د سیلابونو، واورې ښویدنې او زلزلې پېښې را منځ ته کېږي.
