بدخشان ولایت کینگشی اعضالری نینگ ایتیشیچه، بدخشان تومنلریدن بیرقطاریده یوز بیرگن سونگی سوو تاشقین‌لریده اهالی گه کوپلب مالی زیان ییتیشگن؛ بیراق محلی حکومت حاضرگچه زیان کورگن‌لرنینگ وضعیتی گه دقت قیلمه‌گن.
سلام‌وطندارگه صحبت بیرگن بدخشان ولایت کینگشی اعضاسی عبدالله ناجی نظری نینگ ایتیشیچه، زیان کورگنلرگه تیزلیک‌که یاردم ییتکزیلیشی کیره‌ک؛ بیراق مذکور ولایت نینگ طبیعی حادثه‌لرگه قرشی کوره‌ش اداره‌سی طبیعی حادثه‌لرنی باشقریش و زیان کورگنلرگه یاردم ییتکزیش خصوصیده قادر ایمس دیر.
سونگی سوو تاشقین‌لری نتیجه‌سیده تومن‌لردن بدخشان مرکزی گه کیلگن آواره‌لرنینگ ایتیشیچه، کرایی اویلرده یاردم کوته‌دیلر.
یفتل تومنیده یوز بیرگن سونگی سوو تاشقین‌لری نتیجه‌سیده آواره بولگن‌لردن بیری خیرالدین نینگ ایتیشیچه، 20 کوندن بویان بدخشان محلی اداره‌لریده سرگردان یورگن، بیراق هیچ بیر اداره اونینگ سیسی‌نی ایشیتمه‌یدی.
اونینگ ایتیشیچه، کم‌بغل‌لیک و قشاقلیک باعث، 2 یا-ده 3 عایله بیر اتاق ده یشه‌یدیلر.
عین حالده، بدخشان ولایتی نینگ طبیعی حادثه‌لرگه قرشی کوره‌ش اداره‌سی باشلیغی سید عبدالله همایون‌دهقان نینگ ایتیشیچه، زیان ییتیشگن منطقه‌لرده اوتکزیلگن تیکشیروولر یکونلنگن و زیان کورگنلرگه یاردم ییتکزیش باشلنگن.
اونگه کوره، ییترلیچه ییگولیک آذیق-آوقت و باشقه لوازملر موجود دیر و زیان کورگنلرگه یاردم ییتکزیلیشی اوچون بوتونله‌ی تیارگرلیک آلینگن.
بیراق، بدخشان ولایت کینگشی اعضالری نینگ ایتیشیچه، طبیعی حادثه‌لرگه قرشی کوره‌ش اداره‌سی نینگ لایحه‌سی اساسیده یاردم ییتکزیش جریانی اولر اوچون قانیقرلی ایمس دیر.
بدخشان ولایت کینگشی اعضالریگه کوره، طبیعی حادثه‌لرگه قرشی کوره‌ش اداره‌سی نینگ لایحه‌سی اساسیده یاردم ییتکزیش دوام قیلگن صورتده، طبیعی حادثه‌لردن زیان کورگن‌لرنی 80% یاردملردن محروم قاله‌دی.
طبیعی حادثه‌لرگه قرشی کوره‌ش اداره‌سی نینگ لایحه‌سیده کیلیشیچه، ییتکیزیله‌دیگن یاردملرگه اویلری بوتونله‌ی بوزیلگن کیشی‌لر شامل بوله‌دی و بوتونله‌ی تیکشیریلگنده کوپینچه اویلر سونگی حادثه‌لردن زیان کورگن.
شو توغریده…
بدخشان یشاوچیلری: محلی حکومت طبیعی حادثه‌لرگه قرشی کوره‌شه آلمه‌یدی
