بدخشان کې د قېمتي او نیمهقېمتي ډبرو ټولنې مسوولان وايي، تر هغې وروسته چې دولت د یادو ډبرو پر سوداګرۍ بندیز لګولی، کارخونې یې تړلي دي.
د بدخشان قېمتي او نیمهقېمتي ډبرو ټولنې رییس هدایتالله حکیمي سلاموطندار سره په خبرو کې ویلي، دوه کاله وړاندې یې لسګونو ښځینه او نارینهوو ته د کارموندنې ترڅنګ، له ترکیې، اېران او اماراتو سره د قېمتي او نیمهقېمتي ډبرو پلورلو قراردادونه لرل، خو دولت اوس د یادو ډبرو په سوداګرۍ بندیز لګولی دی.
د حکیمي په وینا، که کار یې ځنډول شوی نهوای، د بدخشان ۵ زرو اوسېدونکیو ته یې کار پیدا کاوه. نوموړی وايي، د قېمتي او نیمهقېمتي ډبرو کارخونې یې تړلي او اوس یوازې د لاسې صنایعو کار، هغه هم په پټه کورونو کې کوي.
ګلاحمد چې په یاده کارخونې کې یې کار کاوه وايي، څو کاله وړاندې یې ښه کاروبار درلود، خو د کارخونې تر تړلو وروسته وزګاره شوي؛ ګڼ شمېر همکاران یې ګاونډیو هېوادونو ته کډه شوي او ځینې یې هم له وسلهوالو طالبانو سره یوځای شوي دي.
په همدې حال کې د بدخشان د اقتصاد رییس حسیب دقیق وايي، سیمهییزې ادارې د قېمتي او نیمهقېمتي ډبرو د پروسس او تراش کارخونې له تړلو د مخنیوي په موخه، یادې ټولنې ته د میاشتې ۵ سوه کیلوګرامه ډبرو د لېږد جواز ورکړی دی.
وسلهوالو شاوخوا ۵ کاله وړاندې د بدخشان د لاجوردو پر کان برید وکړ چې په پایله کې یې یاد کان د نامسووله وسلهوالو لاس ته ورغی او هغوی تراوسه پهدې کان کې کیندنې کوي.
حکومت ترهغې وروسته چې وپوهېده، د بدخشان د کانونو ګټه د زورواکو او د دولت وسلهوالو مخالفانو جیبونو ته ځي، د قېمتي او نیمهقېمتي ډبرو پر سوداګرۍ او لېږد بندېز ولګاوه.
اوسمهال بدخشان کې د قېمتي او نیمهقېمتي ډبرو د پروسېس کارخونې تړل شوي او د سوداګرو زرګونه ټنه لاجورد مهرولاک او د پلور مخه یې نیول شوې ده.
