بدخشان ولایتی نینگ مرکزی فیض‌آباد شهرینی 8- ناحیه‌سی گه تیگیشلی یفتل‌بالا منطقه‌سی یشاوچیلریدن بیرقطاری نینگ ایتیش‌لریچه، مذکور منطقه ده امنیتی کوچلرنینگ پوسته‌سی اوستیگه طالبان گروهی تامانیدن اویوشتیریلگن هجوم نتیجه‌سیده ملی خوفسیزلیک عسکرلریدن 2 ته‌سی و حربی عسکرلردن 3 ته‌سی هلاک ایتیلگن و اوشبو کوچلردن باشقه بیرقطاری یره‌لنگن.
اولرنینگ کوپه‌یتیریشیچه، مذکور منطقه ده دولتی کوچلرنینگ پوسته‌لری اوستیگه طالبان تامانیدن اویوشتیریلگن هجوم بوگون «جمعه، 2- جوزا» ایرته‌لب ساعت 12 ده باشلنگن و ایرته‌لب ساعت 4 گچه دوام ایتگن.
اوشبو واقعه محل یشاوچیلری و قربان بولگن‌لرنینگ عایله‌لرینی عکس‌العملی گه روپه‌ره بولگن. یفتل‌بالا منطقه‌سی نینگ یشاوچیلریدن بیرقطاری و امنیتی کوچلرنینگ عایله اعضالری، یوز بیرگن واقعه گه قرشی اعتراض ده قربانلرنینگ جسدلرینی بدخشان مرکزی فیض‌آباد شهری گه انتقال بیریب و دولت دن عدالت سوره‌شگن.
شونینگدیک، اوشبو اعتراضچی‌لر خوفسیزلیک مسؤوللرینی یاردمچی کوچ یوبارمه‌گنی و حربی‌لرگه کوپراق امکانیت یره‌تمه‌گن‌لیک‌که عیب‌لشگن.
اوشبو اعتراضچی‌لر فیض‌آباد شهریده امنیتی کوچلرنینگ جسدلرینی بیرینچی‌دن کسلخانه گه و اوندن کیین حربی کوچلرنینگ لواسی گه انتقال بیریشگن. قربانلرنینگ عایله‌لری بو ایشلریدن مقصد مملکت حربی‌لری و خلق فرزندلری گه دولت تامانیدن کوپراق دقت قیلینیشی دیگن.
هلاک ایتیلگن عسکرلردن بیری نینگ عایله اعضاسی ولی‌الله نینگ ایتیشیچه، یفتل‌بالا منطقه‌سیده مدافعه چیزیغی ده جایلشگن کوچلرنینگ رقمی آز دیر و شو یوزه‌دن طالبان نینگ کینگ هجومی برابریده دولتی کوچلر کوپلب قربانلیک بیرگن.
